રવા કેક [ સૂજી કેક ] - sooji cake

                                                       

રવા કેક  [ સૂજી કેક ] :-

સામગ્રી :-
રવો - 1 કપ
ઘઉંનો લોટ - 1/2 કપ
મેંદો - 1/2 કપ
દહીં - 1/2 કપ
ખાવાનો પીળો રંગ - 1 ચપટી
બેકિંગ પાઉડર - 1 ચમચી
ખાવાનો  સોડા - 1/2 ચમચી
દળેલી ખાંડ - 1 કપ
દૂધ - 1/4 કપ
તેલ - 1/2 કપ
ઈલાયચી પાઉડર - 1/4 ચમચી
કાજૂ - 12 થી 15 નંગ કટ કરેલ

રીત :-
    સૌ પહેલા રવો, ઘઉંનો લોટ, મેંદો, બેકિંગ પાઉડર અને ખાવાના સોડાને બે વાર ચાળી લેવા, હવે એક ઊંડા વાસણમાં તેલ, દહીં અને દળેલી ખાંડને લઇ  ખુબ સારી રીતે ફીણવું, આ મિશ્રણ માખણ જેટલું સોફ્ટ થાય ત્યાં સુધી ફીણવું, હવે તેમાં ચાળેલા લોટનું મિશ્રણ ધીમે ધીમે નાખતા જવું અને હલાવતા જવું, ત્યારબાદ તેમાં ખાવાનો પીળો રંગ [ લાડવાનો રંગ ], દૂધ અને ઈલાયચી પાઉડર નાખી બે મિનીટ ફીણવું, ત્યારબાદ એક કેક બેક કરવાની ટ્રે ને ચારે તરફ તેલ લગાવવું [ ગ્રીઝ કરવું ] અને કેકના મિશ્રણને તેમાં ધીમેથી રેડવું ઉપર કટ કરેલ કાજુને પાથરી સહેજ દબાવી દેવા, હવે ઓવનને 200 સેન્ટીગ્રેડ પર પ્રી હિટ કરી 30 મિનીટ માટે કેક બેક કરવી, પછી તેને ચપ્પુ વડે ચેક કરવી, ચપ્પુ કોરું બહાર આવે તો કેક બરાબર બેક થઇ ગણાય, નહીતર 5 થી 7 મિનીટ ફરી બેક કરવી, ઓવનમાંથી કાઢ્યા બાદ ફરતે ચપ્પુ ફેરવી એક ડીશમાં કાઢી લેવી। [ અનમોલ્ડ કરવી ]

Read More

દાલ ફ્રાય - Dal fry

                                                       

દાલ ફ્રાય :-

સામગ્રી :-
ચણાની દાળ - 1/2 કપ
તુવેર દાળ - 1/2 કપ
ટમેટા - 2 નંગ ઝીણા સમારેલ
ડુંગળી - 1 નંગ ઝીણી સમારેલ
દેશી  ઘી - 3 ચમચા
લીલા મરચા - 2 નંગ ઝીણા  સમારેલ 
લસણની પેસ્ટ - 1 ચમચી
સુકું લાલ મરચું - 1 નંગ
કોથમીર - 1/2 ઝુળી ઝીણી સમારવી
તજ - 1 નાનો ટુકડો
લવિંગ - 2 નંગ
હિંગ - 1 ચપટી
જીરું - 1/2 ચમચી
મીઠું - સ્વાદાનુસાર
હળદર - 1/4ચમચી
લાલ મરચું - 1/2 ચમચી

રીત :-
              સૌ પહેલા બન્ને દાળને ધોઈ તે ડુબે એટલા પાણીમાં અડધો કલાક પલાળવી, ત્યારબાદ તેનું પાણી દુર કરી તેને કુકરમાં અઢી કપ પાણી  [ 2, 1/2 કપ ] અને થોડું મીઠું નાખી ચાર સીટી વગાડી બાફવી, હવે એક વાસણમાં 2 ચમચા ઘી ગરમ કરવું, તેમાં જીરું શેકવું, હવે તેમાં તજ, લવિંગ ઉમેરવા, લીલા મરચા નાખવા, ડુંગળી અને  થોડું મીઠું નાખી તેને સાંતળવી, સમારેલ ટમેટા , હળદર અને  લાલમરચું નાખી તેને બે મિનીટ પકાવવા, હવે તેમાં બાફેલ દાળને બ્લેન્ડ કર્યા વગર આખી દાળ ઉમેરવી, તેને ધીમેથી હલાવી પાંચ મિનીટ પકાવવી, હવે કોથમીર નાખી, તેને હલાવી ગેસ બંધ કરવો, હવે એક વઘારીયામાં બાકીનું ઘી ગરમ કરવું તેમાં આખુ સુકું લાલ મરચું, હિંગ અને લસણની પેસ્ટ નાખી ધુમાડો  નીકળે એટલે સહેજ હલાવી આ વઘાર તૈયાર કરેલ દાળમાં રેડવો, તો તૈયાર ટેસ્ટી પંજાબી દાલ ફ્રાય।

Read More

ગુજરાતી દાળ - Gujarati Dal

                                                       

                                                                              
ગુજરાતી દાળ :-

સામગ્રી :-
તુવેર દાળ - 1 કપ
તેલ - 2 ચમચા
રાઈ - 1/2 ચમચી
જીરું - 1/2 ચમચી
હિંગ - 1 ચપટી
મીઠો લીંબડો - 4 થી 5 પાન
તમાલપત્ર - 2 પાન  
લવિંગ - 2 નંગ
તજ - નાનો ટુકડો
આદુ - નાનો ટુકડો છીણી લેવો
લીલા મરચા - 2 નંગ સમારવા
સુકું લાલ મરચું - 1 નંગ
ટમેટા - 2 નંગ સમારવા
કોકમ - 3 નંગ
લીંબુ - જરૂર મુજબ
કાચા સિંગદાણા - 1/4 કપ
કોથમીર - 1/2 ઝુળી સમારવી
મીઠું - સ્વાદાનુસાર
હળદર - 1/4 ચમચી
ધાણા પાઉડર - 1 ચમચી
લાલ મરચું - 1 ચપટી 
ગરમ મસાલો - 1/4 ચમચી
ગોળ - 2 ચમચી

રીત :-
        સૌ પ્રથમ તુવેર દાળને સારી રીતે ધોઈ અડધો કલાક પલાળવી, ત્યારબાદ તેનું પાણી દુર કરી, તેને કુકરમાં લઇ 4 કપ પાણી, કાચા સીંગદાણા અને થોડું મીઠું નાખવું, હવે ચાર સીટી વગાડી દાળ બાફી લેવી, હવે કુકરની વરાળ નીકળવા દેવી, ત્યારબાદ તેને ખોલી દાળમાં થોડું પાણી, માપનું મીઠું અને હળદર નાખી   જેરી લેવી [બ્લેન્ડ કરી લેવી ] હવે દાળનો વઘાર કરવા માટે વઘારીયામાં તેલ ગરમ કરવું, તેલ ગરમ થાય એટલે તેમાં રાઈ અને  જીરું નાખવું, તે તેતડે એટલે તજ, લવિંગ, હિંગ, કોકમ, સુકું લાલ મરચું અને તમાલ પત્ર  નાખવા તેને હલાવી તેમાસમારેલ લીલા મરચા, લીમડાના પાન અને સમારેલ ટમેટા નાખવા, બે મિનીટ પકાવી આ વઘારને દાળમાંનાખવો, હવે દાળમાં ગોળ, ધાણા પાઉડર, લાલમરચું અને ગરમ મસાલો ઉમેરી તેને હલાવવી, પાંચેક મિનીટ દાળને મધ્યમ તાપમાન પર ઉકાળી ગેસ બંધ કરવો,તેમાં સમારેલ કોથમીર નાખવી, અને ઈચ્છા મુજબના લીંબુની ફાડ કરી ભાત, સૂકીભાજી, રોટલી,પાપડ, અથાણું અને છાશ સાથે સર્વ કરવી, તો તૈયાર છે ટેસ્ટી  ગુજરાતી દાળ.

Read More

દાલ મખની - Dal Makhani

                                                               

દાલ  મખની :-

સામગ્રી :-
આખા અડદ - 1/2 કપ
રાજમાં - 2 ચમચા
દેશી  ઘી - 1 ચમચી
માખણ - 2 ચમચી વઘારમાં અને  1 ચમચો ગાર્નીસ કરવા
મલાઈ - 1/2 કપ
ડુંગળી - 2 નંગ ઝીણી સમારેલ
ટમેટા - 2 નંગ પ્યુરી કરવી
મીઠું - સ્વાદાનુસાર
જીરું - 1 ચમચી
ગરમ મસાલો - 1/4  ચમચી
લાલમરચું - 1/2 ચમચી
લસણ - 10 કળી પેસ્ટ કરવી
આદુ - 1 નાનો ટુકડો ઝીણો સમારેલ
કોથમીર - 1 ચમચો ઝીણી સમારેલ

રીત :-
       સૌ પહેલા રાજમાં અને આખા અડદને આખી રાત પાણીમાં પલાળવા, બનાવતી વખતે તેનું પાણી દુર કરી તેને કુકરમાં બે કપ પાણી અને ચપટી સોડા નાખી ત્રણ સીટી કરી બાફી લેવા, હવે આ બાફેલ કઠોળનું પાણી અલગ કરી તેને મૂકી રાખવું, હવે એક વાસણમાં ઘી ગરમ કરવું, તેમાં 2 ચમચી માખણ ઉમેરવું, તેમાં જીરું નાખી શેકવું, ત્યારબાદ તેમાં લસણની પેસ્ટ, સમારેલ આદુ અને સમારેલ ડુંગળી સાંતળવી,મીઠું નાખવું, ડુંગળી ગોલ્ડન બ્રાઉન કલરની થાય ત્યારે તેમાં ટમેટાની પ્યુરી ઉમેરવી, બે મિનીટ પકાવવું, ત્યારબાદ તેમાં
બાફેલ અડદ અને રાજમાં અને તેનું અલગ મુકેલ પાણી માંથી એક કપ પાણી ઉમેરવું, મલાઈ  પણ ઉમેરી દેવી, આ બધું સારી રીતે હલાવી તેમાં લાલમરચું અને ગરમ મસાલો નાખવો, હવે તેનો ઘટ્ટ રસો થાય એટલે ગેસ બંધ કરી, તેને માખણ અને કોથમીરથી ગાર્નીસ કરવું, ટેસ્ટી પંજાબી દાલ મખની તૈયાર।

Read More

કોકોનટ બરફી - Coconut burfi

                                                                   

કોકોનટ બરફી :-

સામગ્રી :-
કોપરાનું છીણ [ સૂકું અથવા તાજુ ] - 1, 1/2 કપ
દૂધ - 1 કપ
ખાંડ - 1/2 કપ
ઈલાયચી પાઉડર - 1 ચપટી
ઘી - 1/2 ચમચી

રીત :-
       સૌ પ્રથમ એક વાસણ ગેસ પર ગરમ કરવું, તેમાં 1/2 ચમચી ઘી નાખવું, કોપરાનું તાજું છીણ નાખી તેને એક મિનીટ સાંતળવુ, હવે તેમાં દૂધ ઉમેરવું અને સતત હલાવતા જઈઘટ્ટ કરવું, હવે દૂધ થોડું ઘટ્ટ થાય કે ગેસ ધીમો કરી હલાવવું, દૂધ એકદમ ઘટ્ટ થઇ જામવા જેવું લાગે એટલે ગેસ બંધ કરવો ઈલાયચી પાઉડર નાખી, તેને ઘી લગાવેલ ડીશમાં પાથરી દેવું, તેના પર કાજૂ અથવા બદામ  લગાવી શકાય, હવે આ બરફીને ફ્રીઝમાં એક કલાક રાખીને ચોરસ આકારમાં કટ કરવી।

Read More

બોમ્બે હલવો - Bombay Halwo

                                                                  

બોમ્બે હલવો :-

સામગ્રી :-
કોર્નફલોર - 1 કપ
ખાંડ - 2 કપ
પાણી - 3 કપ
કાજૂ - 10 નંગ
બદામ - 10 નંગ
ઘી - 4 ચમચા
લીંબુના ફૂલ [ સાઈટ્રીક એસીડ ] - 1/2 ચમચી
લીલો અથવા પીળો કલર - 1 ચપટી

રીત :-
        સૌ પહેલા કાજૂ અને બદામને નટકટર અથવા ચપ્પુ વડે કટ કરી લેવા, હવે એક વાસણમાં કોર્નફલોર, પાણી અને ખાંડ મિક્સ કરી  તેને પાંચેક મિનીટ હલાવવું જેથી કોર્નફ્લોરમાં ગઠ્ઠા ના રહે, ત્યારબાદ તેમાં કલર મિક્સ કરવો, ફરી બે મિનીટ હલાવવું, હવે આ વાસણને ફાસ્ટ ગેસ પર મૂકી ચમચા અથવા તવેથા વડે સતત હલાવવું, જયારે આ મિશ્રણ ઘટ્ટ અને થોડું પારદર્શક લાગે એટલે ગેસ ધીમો કરવો અને તેમાં 2 ચમચા ઘી, ડ્રાયફ્રુટ અને લીંબુના ફૂલ ઉમેરવા, હવે ધીમા ગેસ પર જ તેને સતત હલાવતા રહેવું, હવે જયારે તે તવેથો ઉભો રહે એટલું ઘટ્ટ થાય એટલે બાકીનું ઘી નાખી ગેસ બંધ કરવો, તરત એક ડીશમાં ઘી લગાવી આ મિશ્રણ તેમાં ઠારવું, ઠરી જાય એટલે ચોરસ કાપા  પાડવા,  ટેસ્ટી, સ્વીટ બોમ્બે  હલવો તૈયાર।

Read More

ચપાટી - રોટલી - Rotali

                                                            

ચપાટી - રોટલી :-

સામગ્રી :-
ઘઉંનો લોટ - 2 કપ
મીઠું - સ્વાદાનુસાર
તેલ - 1, 1/2 ચમચો
ઘી - રોટલી પર લગાવવા 

રીત :-
         સૌ પ્રથમ એક પહોળા વાસણમાં [કથરોટ ] ઘઉં નો લોટ ચાળી લેવો, બાઉલ પણ લઇ શકાય, પણ લોટને યોગ્ય રીતે મસળવા કથરોટ જ સારી રહે છે , હવે તેમાં મીઠું અને 1 ચમચો તેલ ઉમેરવું, તેમાં થોડું થોડું પાણી નાખતા જઈ નરમ લોટ બાંધી લેવો, લોટને પાંચેક મિનીટ ખુબ મસળવો, ત્યારબાદ તેને 15 મિનીટ માટે ઢાંકીને રાખી મુકવો, 15 મિનીટ બાદ તેમાં 1/2 ચમચો તેલ ઉમેરી લોટ મસળી લેવો, હવે તેમાંથી જે સાઈઝની રોટલી બનાવવી હોય તે પ્રમાણે લુવા તૈયાર કરવા, રોટલી પાતળી અને નાનીથી લઇ મોટી અને મિડીયમ સાઈઝની ઈચ્છા મુજબ વણી શકાય, પણ તેનો શેઈપ એકદમ ગોળ હોવો જોઈએ અને બધી બાજુની જાડાઈ એકસરખી હોવી જોઈએ, રોટલી શિખવાની શરૂઆતમાં થોડો આકાર બદલી પણ જાય, પણ તેની રેગ્યુલર પ્રેક્ટીસ વડે જ ગોળ વણતા આવડે, આમ લુવામાંથી રોટલી વણતા જવું, સાથે સાથે ગેસ પર તવો ગરમ કરવા મુકવો, તવો ગરમ થાય કે વણીને તૈયાર કરેલ રોટલીનો નીચેનો ભાગ ઉપર રહે તેમ તવામાં નાખવી, હવે આ રોટલીમાં નાના બબલ દેખાય એટલે ફેરવવી, હવે બીજી બાજુ તેને ગોલ્ડન બ્રાઉન બબલ થાય તેમ એકદમ શેકવી, હવે જો રોટલી ફૂલકા કરવી હોય તો ચીપિયા વડે લઇ ફેરવી  સીધી ફ્લેમ પર ફુલાવી નીચે ઉતારી લેવી, અને તવામાં જ શેકવી હોય તો ફેરવી કોટનના કપડા વડે ધીમેથી દબાણ આપતા જઈ શેકી લેવી, નીચે ઉતારી 1/4 ચમચી ઘી લગાવવું અથવા કોરી પણ રાખી શકાય, આવી રીતે બધી રોટલી વણીને પકાવી લેવી,તેને વિવિધ શાક અથવા દાળ સાથે ખાઈ શકાય.

Read More

બટાકાની વેફર - potato chips

                                                           

બટાકાની વેફર :-

સામગ્રી :-

બટાકા - 1 કિલો થી લઇ 5કિલો સુધી ઈચ્છા પ્રમાણે
ફટકડી - એક નાનો ટુકડો
મીઠું -  સ્વાદાનુસાર
આમચૂર - સ્વાદાનુસાર
ખાંડનો પાઉડર - સ્વાદાનુસાર
લાલ મરચું - સ્વાદાનુસાર

રીત :-
       સૌ પહેલા બટાકાને ધોઈને, છોલી લેવા, ત્યારબાદ તેમાંથી વેફર પાડવાના મશીન વડે વેફર પાડી પાણીમાં ડૂબેલ રાખવી, હવે તેને બે ત્રણ વખત પાણીમાં ધોઈ લેવી, પાણી બહાર  કાઢવી નહી, જેથી તે કાળી પડે નહિ, હવે ગેસ પર મોટું તપેલું રાખી, તેને અડધું પાણીથી ભરી પાણી ગરમ કરવું, પાણી ઉકળે એટલે તેમાં થોડું મીઠું અને ફટકડીનો નાનો ટુકડો નાખીને હલાવવું, આ પાણીમાં વેફર છૂટી છૂટી નાખવી, અધકચરી બફાય એટલે ઝારાથી નિતારીને કાઢી લેવીને તરત તેને તડકામાં છૂટી છૂટી સૂકવવી, આ રીતે બધી વેફર બાફીને તડકામાં છૂટી સુકવી દેવી, સુકાઈ જાય એટલે હવાચુસ્ત ડબામાં ભરી લેવી, જયારે ખાવી હોઈ ત્યારે ગરમ તેલમાં તળીને તેના પર ખાંડનો પાઉડર, આમચૂર, લાલમરચું અને જરૂર લાગે તો મીઠું છાંટીને ખાવી

Read More

ભટુરા - Bhatura

                                                               

ભટુરા :-

સામગ્રી :-

મેંદો - 2, 1/2 કપ
દહીં - 1/2કપ
ખાંડનો પાઉડર - 2 ચમચી
તેલ - 3 ચમચા લોટ બાંધવા + તળવા
 મીઠું - સ્વાદાનુસાર
બેકિંગ સોડા - 1 ચપટી
બેકિંગ પાઉડર - 1/2 ચમચી

રીત :-
      સૌ પહેલા એક વાસણમાં મેંદો , બેકિંગ સોડા અને બેકિંગ પાઉડર મિક્સ કરવા ,  તેને ચારણી વડે લોટ બાંધવાના વાસણમાં ચાળી લેવું, એક વાટકીમાં દહીં, ખાંડ અને મીઠું લઇ તેને ચમચી વડે હલાવવું, જેથી ખાંડ અને મીઠું દહીંમાં ઓગળી જાય, હવે ચાળેલ લોટ વચ્ચે ખાડો કરી તેમાં દહીં અને 1 ચમચો  તેલ રેડવું, હવે એકજ દિશામાં હાથ ફેરવતા જઈ અને થોડું થોડું પાણી ઉમેરતા જઈ સહેજ ઢીલો લોટ બાંધવો, 2 ચમચા તેલ નાખી  મુઠ્ઠી વાળેલ આંગળા વડે લોટ મસળવો, હવે આ લોટને એક છેડેથી પકડી તેને પછાડતા જઈ આંટી વાળવી, ફરી તેને ભેગો કરી પછાળવો, આ રીતે પાંચેક મિનીટ કરવું, હવે તેને સુતરાઉ કપડામાં 1 કલાક માટે ઢાંકી રાખવો જેથી તે ફૂલે, એક કલાક બાદ તેમાંથી  એક સરખા માપના 8 થી 9 લુવા તૈયાર કરવા, તેને તેલ લગાવી 10 મિનીટ રાખવા, ત્યારબાદ તેમાંથી લંબગોળ આકારની રોટલીથી સહેજ જાડી મોટી પૂરી વણવી, ત્યારબાદ એક વાસણમાં તેલ ગરમ કરવા મુકવું, તેલ એકદમ  ગરમ કરવું, ભટુરા ફૂલાવવા તેલ વધુ ગરમ જોઈએ, તેમાં ભટુરા તળી લેવા, તેલ સતત ગરમ રાખવું નહિ, વચ્ચે ગેસ ધીમો  પણ કરવો, તો તૈયાર છે પંજાબી ભટુરા।

 

Read More

ભરેલા ભીંડા - Bharela Bhinda

                                                                 

ભરેલા ભીંડા  -

સામગ્રી :-

ભીંડો - 200 ગ્રામ 
કાચા સીંગદાણા - 4 ચમચી
ચણાનો લોટ - 4 ચમચી
ગોળ - 2 ચમચી
તેલ - 1 ચમચો વઘાર માટે અને 1 ચમચી સ્ટફિંગ માટે
જીરું - 1/2 ચમચી
રાઈ - 1/2 ચમચી
મીઠું - સ્વાદાનુસાર
હળદર - 1/4 ચમચી
ધાણા પાઉડર - 1, 1/2 ચમચી
ગરમ મસાલો - 1/4 ચમચી
લાલ મરચું - 1/4 ચમચી
લસણની પેસ્ટ [ થોડુ મીઠું અને લાલ મરચુ નાખેલ ] - 1 ચમચી

રીત :-
         સૌ પ્રથમ ભીંડો ધોઈ તેને કોરો કરવો, ત્યારબાદ એક વાસણમાં કાચા સીંગદાણા લઇ તેને શેકવા, તેને ઠંડા થવા દેવા, હવે  ધીમા તાપે 2 મિનીટ માટે ચણાનો લોટ શેકવો, શેકેલ સીંગદાણાને અધકચરા વાટવા, હવે ભીંડાને ચપ્પુ વડે બંને બાજુએથી થોડો ભાગ દુર કરી એક ઉભો કાપો પાડવો , જેમાં મસાલો ભરી શકાય,
આ રીતે બધા ભીંડા સમારી લેવા, ત્યારબાદ એક ડીશમાં વાટેલ સીંગદાણા, ચણાનો લોટ , હળદર, મીઠું, લાલ મરચુ, ધાણા પાઉડર, ગરમ મસાલો , 1 ચમચી તેલ, ગોળ, લસણની પેસ્ટ આ બધું સારી રીતે મસળીને મિક્સ કરવું, આ મસાલામાં જરૂર લાગે તો બે ચમચી જેટલું પાણી ઉમેરવું જેથી સારી રીતે ભીંડામાં ભરી શકાય, હવે સમારેલ ભીંડામાં આ મસાલો ભરી લેવો , હવે એક વાસણમાં તેલ ગરમ કરવા મુકવું, તેલ ગરમ થાય એટલે તેમાં રાઈ, જીરું નાખવા, તે તતડે એટલે ભરીને તૈયાર કરેલ ભીંડાનો મસાલા વાળો ભાગ નીચે આવે તેમ ગોઠવવા, તેને મધ્યમ તાપ પર બે મિનીટ પકાવવા, ત્યારબાદ ભીંડાની સાઈડ ચેન્જ કરવી અને  ધીમા ગેસ પર 5 થી 7 મિનીટ પકાવવા, તો તૈયાર છે ભરવા ભીંડી।

Read More

ભરવા બૈંગન -Bharwa baingan

                                                       

ભરવા બૈંગન :-

સામગ્રી :-

નાના રીંગણ - 300 ગ્રામ
રાઈનું તેલ [ મસ્ટર્ડ ઓઈલ ] - 3 ચમચા
સમારેલ કોથમીર - 3 ચમચા
લીલા મરચા - 2 નંગ
આદુ લસણની પેસ્ટ - 1 ચમચી
મીઠું - સ્વાદાનુસાર
હિંગ - 1 ચપટી
જીરુ - 1/2 ચમચી
હળદર - 1/4 ચમચી
ધાણા પાઉડર - 2 ચમચી
વરિયાળી પાઉડર - 2 ચમચી
લાલ મરચું - 1/2 ચમચી
આમચુર - 1 ચમચી
ખાંડ - 1 ચમચી
ચણાનો લોટ - 3 ચમચી
[ રાઈનાં  તેલને સ્થાને ઘરમાં વપરાતું રીફાઇન્ડ ઓઈલ પણ વાપરી શકાય ]

રીત :-
         સૌથી પહેલા રીંગણ ધોઈ તેને કોરા કરવા, લીલા મરચા ઝીણા સમારી લેવા, હવે રીંગણને ડંઠલથી પકડી તેમાં એવી રીતે બે કાપા પાડવા કે તે નીચેથી જોડાયેલ રહે છતાં તેના ચાર ભાગ પડે, હવે એક ડીશમા ધાણા પાઉડર, વરિયાળી પાઉડર, મીઠું,હળદર, લાલ મરચું, આમચૂર, ખાંડ, પેસ્ટ, સમારેલ મરચા, અડધી સમારેલ કોથમીર અને ચણાનો લોટ મિક્સ કરવો,તેનામાં થોડી ભીનાશ રહે અને આ મસાલો રીંગણમાં ભરી શકાય તેટલું જ 2 ચમચી જેટલું પાણી નાખવું, મસાલો મિક્સ કરી તેને રીંગણની વચ્ચે ભરી રીંગણ થોડું દબાવી દેવું, જેથી મસાલો બહાર ના નીકળે, આ રીતે બધા રીંગણ ભરી લેવા, હવે એક વાસણમાં તેલ ગરમ કરવું, તેમાં જીરું શેકવું, હિંગ નાખવી, ત્યારબાદ બધા રીંગણ આ વાસણમાં ગોઠવી ઢાંકણ બંધ કરી 5 મિનીટ પકાવવા, પાણી નાખવું નહી, કારણ કે રીંગણમાં કુદરતી પાણી હોય છે, હવે ઢાંકણ ખોલી રીંગણની સાઈડ ચેન્જ કરવી, ફરી 5 મિનીટ પકાવવા, ઢાંકણ ખોલી રીંગણ જે ભાગેથી કાચા હોય તે ભાગ નીચે રાખી 2 મિનીટ પકાવવા, જયારે રીંગણ દબાવતા એકદમ સોફ્ટ લાગે ત્યારે ગેસ બંધ કરવો, કોથમીર વડે ગાર્નીશ કરવા।
                                   
            

Read More

ખીર - Kheer

                                                                  

ખીર :-

સામગ્રી :-
ફુલ ક્રીમ મિલ્ક  - 1 લિટર
ચોખા - 50 ગ્રામ
ખાંડ - 150 ગ્રામ
ઈલાયચી - 4 થી 5 નંગ
[ ખીરને બદામ, પિસ્તા કટ કરી તેના વડે ગાર્નીશ કરી શકાય ]

રીત :-
         સૌ પ્રથમ ચોખાને ધોઈ તે ડૂબે તેટલું પાણી નાખી તેને એક કલાક માટે પલાળવા, ત્યારબાદ એક વાસણમાં દૂધ લઇ તેને હલાવતા જઈ ગરમ કરવું, જેથી તે તળિયામાં ચોંટે નહી, દૂધ થોડું ગરમ થાય એટલે
પલાળેલ ચોખાનું પાણી દુર કરી તેને દુધમાં ઉમેરવા,ગેસ ધીમો કરવો, જ્યાં સુધી ચોખા દુધમાં બફાઈ જાય નહી  ત્યાં સુધી તેને હલાવતા રહેવું, આ માટે ચોખાનો એક દાણો  ચમચામાં લઇ દબાવવો, જો તે ઈઝિલી દબાઈ જાય તો ખીરમાં ખાંડ ઉમેરવી, ખીર ફરી 5 મિનીટ હલાવતા જઈ ઉકાળવી, છેલ્લે તેમાં ઈલાયચીનો ભૂકો કરી ઉમેરવો, ખીર તૈયાર।

Read More

બૈંગન કા ભરથા - Baingan ka bhartha

બૈંગન કા ભરથા :-

સામગ્રી :-
મોટું રીંગણ [ 200 ગ્રામ જેટલું ] - 1 નંગ
લીલી ડુંગળી - 2 નંગ
લીલા મરચા - 2 નંગ
ટમેટા - 2 નંગ
કોથમીર - 1/2 ઝૂળી
આદુ લસણની પેસ્ટ - 1 ચમચી
તેલ - 2 ચમચા
જીરું - 1/2 ચમચી
હિંગ - 1/4 ચમચી
ગરમ મસાલા - 1/4 ચમચી
ધાણા પાઉડર - 1/2 ચમચી
મીઠું - સ્વાદાનુસાર
હળદર - 1/4 ચમચી
લાલ મરચું - 1/4 ચમચી
 [ લીલી ડુંગળીના બદલે સુકી ડુંગળી પણ લઇ શકાય, તો કોથમીર વધુ લેવી ]

રીત :-
            સૌ પ્રથમ લીલી  ડુંગળી, ટામેટા, કોથમીર અને લીલા મરચાને ઝીણા સમારી લેવા, હવે રીંગણ પર હાથ વડે તેલ લગાવવું, તેમાં ચપ્પુ વડે કાપા  કરવા જેથી શેકતી વખતે તે અચાનકફૂટે નહી, ક્યારેક રીંગણ અંદરથી ખરાબ હોઈ શકે આ માટે તેની પર કાપા કરવાની બદલે તેને ઉપરથી થોડા કટ કરીને પણ જોઈ શકાય, હવે તેને સીધા ગેસની હાઈ ફ્લેમ પર પણ શેકી શકાય અને માઇક્રોવેવમાં પણ શેકી શકાય, માઇક્રોવેવમાં શેકવા માટે તેને માઈક્રો હાઈ પર 5 મિનીટ રાખવું, અને ગેસ પર શેકવા તેને હાઈ ફ્લેમ પર મૂકવું, એક ભાગેથી શેકાય એટલે ગોળ ફેરવી બીજો ભાગ શેકવો, આ રીતે આખું રીંગણ શેકવું, તેને દબાવતા એકદમ સોફ્ટ લાગે એટલે ગેસ બંધ કરી ઠંડુ કરવું, હવે રીંગણની છાલ ઉતારી તેને ચોપ કરી લેવું, હવે એક વાસણમાં તેલ ગરમ કરવું તેમાં જીરું શેકવું, તેમાં હિંગ ,લીલા મરચા અને આદુ મરચાની પેસ્ટ નાખવી,
તેને હલાવી સમારેલ લીલી  ડુંગળી અને મીઠું નાખવું, તેને બે મિનીટ સાંતળી તેમાં સમારેલ ટમેટા નાખવા,હવે બાકીના મસાલા હળદર, લાલ મરચું , ધાણા પાઉડર અને ગરમ મસાલો નાખવો, બે મિનીટ કુક થવા દઈ તેમાં બાફી ચોપ કરેલ રીંગણ નાખવું, હલાવી ને થોડીવાર રહેવા દઈ ગેસ બંધ કરવો, કોથમીર નાખી હલાવી લેવો, ટેસ્ટી બૈંગન કા ભરથા તૈયાર.

Read More

બાટી - Baati

                                                                    

બાટી :-

સામગ્રી :-
ઘઉંનો જાડો લોટ - 2 કપ
મીઠું - સ્વાદાનુસાર
બેકિંગ પાઉડર - 1/4 ચમચી
દેશી ઘી - 1/2 કપ લોટ બાંધવા અને બાકીનું ઘી બાટી બોળવા માટે
પાણી - જરૂર પ્રમાણે

રીત :-
          સૌ પ્રથમ ઘઉંના જાડા  લોટમાં મીઠું, બેકિંગ પાઉડર, 1/2 કપ ઘી અને ખુબજ ઓછા પાણી સાથે કઠણ લોટ બાંધવો, હવે આ લોટમાંથી  રોટલીના લુવાથી સહેજ મોટો લુવો લઇ હાથ વડે દબાવતા જઈ ગોળો તૈયાર કરવો, આ રીતે લોટમાંથી ગોળા તૈયાર કરી લેવા, હવે એક બેકિંગ ટ્રે માં તેલ લગાવી [ગ્રીઝ કરી ] બાટી માટે તૈયાર કરેલા ગોળા તેમાં સહેજ દબાવતા જઈ ગોઠવવા , ત્યારબાદ ઓવનને 180' સેન્ટીગ્રેડ પર પ્રી હિટ કરી, 20 મિનીટ માટે બાટી શેકવી, સામાન્ય રીતે બાટી શેકવા તંદુરનો ઉપયોગ થાય છે, જેમાં તેને હાઈ હિટ પર શેકવામાં આવે છે, જયારે ઓવનમાં લઘુત્તમ તાપમાનમાં પણ તે એકદમ ક્રિસ્પી બને છે, હવે આ તૈયાર કરેલ બાટીમાં ચમચી વડે કાપા કરતા જઈ એક કટોરીમાં ઘી લઇ તેમાં તેને બોળતા જઈ સર્વિંગ પ્લેટ પર ગોઠવવી, સ્વાદિષ્ટ રાજસ્થાની  દાલબાટીમાનું એક વ્યંજન બાટી તૈયાર।

Read More

આલુ પરાઠા - Aloo parotha

                                                            

આલુ પરાઠા :-

સામગ્રી :-

મધ્યમ કદનાં બટાકા - 2 થી 3 નંગ
રોટલીનો લોટ - 2 કપ
અટામણ - જરૂર મુજબ
લીલા મરચા - 2 નંગ
ડુંગળી - 2 નંગ
કોથમીર - 1/2 ઝૂળી
તેલ - જરૂર મુજબ
મીઠું - સ્વાદાનુસાર
ધાણાજીરું પાઉડર - 2 ચમચી
હળદર - 1/4 ચમચી
ચાટ મસાલો - 1/2 ચમચી
લાલ મરચું - 1 ચમચી

રીત :-
          સૌ પ્રથમ બટાકા બાફવા, બટાકા એવી રીતે બાફવા કે તે ચીકણા ના પડે, આ માટે તેને બાફવા માઇક્રોવેવ અથવા કુકરમાં ઓછું પાણી નાખી તેને અધકચરા બાફવા, ડુંગળી, લીલામરચા અને કોથમીર ઝીણી સમારી લેવી, હવે બાફેલા બટાકાનો માવો કરી, તેમાં સમારેલ ડુંગળી, લીલા મરચા, કોથમીર, હળદર,લાલ મરચું, ચાટ મસાલો, ધાણાજીરું પાઉડર અને ચાટ મસાલામાં સહેજ ખારાશ હોવાથી મીઠું માપમાં ઉમેરી મસાલો તૈયાર કરવો , હવે રોટલીના લોટમાંથી બે રોટલી વણવી, રોટલી વણવા બહુ અટામણ લેવું નહી, હવે એક રોટલી લઇ તેની ઉપર બટાકાનો મસાલો પાથરવો, તેની પર બીજી રોટલી રાખી નીચેની રોટલીની કિનારી સાથે આ રોટલીની કિનારી ફોલ્ડ કરવી, હવે હળવા હાથે આ પરાઠાને વણવો, આ રીતે બધા પરાઠા વણી લેવા, હવે એક તવાને ગરમ કરવો, તવો ગરમ થાય કે પરાઠાને શેકવા નાખવો, પરાઠામાં સહેજ બબલ દેખાય કે તેની સાઈડ બદલવી હવે ઉપરની બાજુ એક ચમચી જેટલું તેલ લગાવવું, નીચેની બાજુ શેકાય કે સાઈડ બદલી પરાઠાને તવેથા વડે દબાવી તળવો, હવે બીજી બાજુ પણ તેલ લગાવી તેને સાઈડ  બદલી દબાવતા જઈ તળી લેવો , આ રીતે બધા પરાઠા તળી લેવા, આલુ પરાઠાને નાસ્તામાં પણ લઇ શકાય અને જમવામાં કે દહીં સાથે પણ ખુબ ટેસ્ટી લાગે છે.
 

Read More

આલુ ટીક્કી - Aloo tikki

                                                          

આલુ ટીક્કી :-

સામગ્રી :-
બટાકા - 300 ગ્રામ
લીલા વટાણા - 3/4 કપ
પનીર - 1/4 કપ
મીઠું - સ્વાદાનુસાર
ગરમ મસાલો - 1/4 ચમચી
લાલ મરચું - 1/2 ચમચી
આમચૂર - 1/4 ચમચી
ખાંડ - 1/2 ચમચી
કોથમીર - 1/4 ઝૂળી અથવા 2 ચમચી
તેલ - તળવા માટે

રીત :-
       આલુ ટીક્કી બનાવવા માટે બટાકાનો માવો ઉપયોગમાં લેવાય છે, અને તે ડ્રાય હોવો ખુબ જરૂરી છે, કારણ કે જો તે ચીકણો હોય તો ટીક્કી તળવા સમયે વિખરાઈ જાય છે, આ માટે બટાકામાંથી ત્રણ રીતે કોરો માવો તૈયાર કરી શકાય, 1. જયારે ટીક્કી બનાવવી હોય તેના 6 થી 7 કલાક પહેલા બટાકા બાફી, તેનો માવો કરી તેને ફ્રીઝમાં ઢાંક્યા વગર મુકવો  2. બટાકાને માઇક્રોવેવમાં  બાફી તેનો માવો ઉપયોગમાં લેવો 3. બટાકાને અધકચરા બાફી, છીણી તેને ઉપયોગમાં લેવા, સૌ પહેલા વટાણાને અધકચરા વાટી લેવા, તેમાં પનીરને હાથ વડે મસળી લેવું, હવે તેમાં વટાણા પુરતું મીઠું અને બાકીનો મસાલો ઉમેરવો, કોથમીર ઝીણી સમારીને નાખવી,આ ટીક્કીમાં ભરવાનું ફીલિંગ છે, હવે બટાકાના માવામાં મીઠું નાખી, તેને બહુ મસળ્યા વગર એકસરખા લુવા તૈયાર કરવા, છતાં જો માવો ચીકણો લાગે તો 2 ચમચી કોર્નફ્લોર નાખી લુવા તૈયાર કરવા, હવે આ લુવાને લઇ તેને વચ્ચે હથેળી અથવા આંગળા વડે દબાણ આપી ખાડો કરવો , તેમાં લુવા થી ત્રીજા ભાગનું તૈયાર કરેલ ફીલિંગ ભરી તેને અંદર બંધ થાય તેમ લુવાની કોર ભેગી કરી, હળવા હાથે દબાણ આપવું, આમ બધી ટીક્કી તૈયાર કરવી, હવે એક નોન સ્ટીક માં 2 થી 3 ચમચી તેલ ફેલાવવું, તે ગરમ થાય એટલે તેમાં બટાકાના માવાની એક નાની ગોળી બનાવી તેલમાં નાખવી જો તે વિખરાઈ તો તેલ વધુ ગરમ કરવું, ના વિખરાઈ તો પાંચેક ટીક્કી તળવા ધીમેથી નાખવી, તે નીચેથી ગોલ્ડન બ્રાઉન કલરની થાય એટલે ધીમેથી સાઈડ બદલવી, જરૂર પડે તો તેલ નાખી બીજી બાજુ પણ સરખી તળવી, આ રીતે બધી ટીક્કી તૈયાર કરવી, ટિક્કીને કડાઈમાં તેલ લઇ તેલડૂબ  પણ તળી શકાય, લીલી અથવા લાલ ચટણી અથવા કેચપ કે ગમે તેની સાથે ટિક્કીનો નાસ્તો ટેસ્ટી જ લાગશે।

Read More

આલુ ગોબી - Aloo gobi

આલુ ગોબી :-

સામગ્રી :-
બટાકા - 250 ગ્રામ
ફ્લાવર - 250 ગ્રામ
ટમેટા - 2 નંગ
ડુંગળી - 2 નંગ
લીલા મરચા - 3 નંગ
આદૂ - 1 ઇંચ
લસણ - 3 કળી
જીરું - 1 ચમચી
મીઠું - સ્વાદાનુસાર
હળદર - 1/4 ચમચી
ધાણાજીરું પાઉડર - 1 ચમચી
ગરમ મસાલો - 1 ચમચી
લાલ મરચુ - 1 ચમચી
તેલ - 1, 1/2 ચમચો ઉપરાંત શાક તળવા માટે
કોથમીર - 1 ઝૂળી

રીત :-
        સૌ પ્રથમ ફ્લાવર [ ફૂલ ગોબી ] અને બટાકાને સારી રીતે ધોઈ તેને સમારી લેવા, બટાકાને છોલી  થોડા પાતળા સમારવા,  બટાકાને સ્થાને નાની બટાકી પણ લઇ શકાય, બટાકી હોય તો છોલી તેમાં કાપા પાડી લેવા, હવે પહેલા બટાકાને ગોલ્ડન બ્રાઉન કલરના તળવા, ત્યારબાદસમારેલ  ફ્લાવરને બ્રાઉન તળવા, હવે આદુ, લીલા મરચા અને લસણને કટ કરી તેની પેસ્ટ તૈયાર કરવી,ડુંગળીને ઝીણી સમારવી, કોથમીર  અને ટમેટા પણ ઝીણા સમારવા, ત્યારબાદ એક વાસણમાં તેલ ગરમ કરવા મુકવું, હવે તેમાં જીરું શેકવું,ત્યારબાદ તેમાં આદુ મરચાની પેસ્ટ નાખી હલાવી સમારેલ ડુંગળી નાખવી, મીઠું નાખી ડુંગળીને કલર ચેન્જ થાય ત્યાં સુધી સાંતળવી, હવે તેમાં સમારેલ ટમેટા નાખી બે મિનીટ કુક કરવા, તે સ્મૂથ થાય એટલે હળદર, ધાણાજીરું પાઉડર, લાલ મરચું, અડધી ચમચી ગરમ મસાલોઅને કોથમીર અડધા ભાગની નાખવી , હવે તેમાં તળેલા ફ્લાવર, બટાકા અને 3/4 કપ પાણી નાખી ઢાંકણ બંધ કરી પાંચ મિનીટ ઉકળવા દેવું, ત્યારબાદ તેમાં બાકીનો ગરમ મસાલો નાખી, હલાવી ગેસ બંધ કરવો,  સબ્જીને સમારેલ કોથમીર વડે ગાર્નીશ કરવી। 
       

Read More

આલુ બૈંગન - Aloo Baingan

આલુ બૈંગન :-

સામગ્રી :-
બટાકા - 250 ગ્રામ
રીંગણ - 250 ગ્રામ
રાઈ - 1/2 ચમચી
જીરું - 1/2 ચમચી
મીઠું - સ્વાદાનુસાર
હળદર - 1/4 ચમચી
ધાણા પાઉડર - 1/2 ચમચી
લાલમરચું - 1/2 ચમચી
લસણની પેસ્ટ - 1/2 ચમચી
ખાંડ -  1/2 ચમચી
કોથમીર - 1/2 ઝૂડી
તેલ - 1 ચમચા

રીત :-
           સૌ પહેલા બટાકા અને રીંગણને ધોઈ તેના  એક સરખા ટુકડા કરવા, બટાકાના ટુકડા થોડા પાતળા રાખવા કારણ કે બટાકા રીંગણ કરતા થોડા મોડા પાકે છે, તેને પાતળા રાખવા થી તે પણ રીંગણ સાથે જ પાકી જશે, હવે એક વાસણમાં તેલ ગરમ કરવા મુકવું, તેમાં રાઈ અને જીરું નાખવા, તે તતડે એટલે તેમાં લસણની પેસ્ટ નાખી તેને હલાવી સમારેલ રીંગણ, બટાકા નાખવા હવે તેમાં મીઠું, હળદર, ધાણા પાઉડર, લાલમરચું અને ખાંડ નાખી દેવી, બે મિનીટ ધીમા તાપે શાક હલાવતા જઈ સાંતળવું, હવે તેમાં 1 કપ પાણી નાખવું, તેને કુકરમાં વઘારેલ હોય તો ત્રણ સીટી કરવી, અને કોઈ બીજા વાસણમાં હોય તો ઢાંકણ બંધ કરી મધ્યમ તાપમાં 10 મિનીટ પકાવવું, જો રસો વધુ જોઈએ તો થોડું પાણી નાખી 1 મિનીટ ફરી ઉકાળી શાક પાકે એટલે ગેસ બંધ કરવો, કોથમીર વડે ગાર્નીશ કરવું, ટેસ્ટી શાક તૈયાર।

Read More

અંજીરનો હલવો - Anjir halawa

                                                         

અંજીરનો હલવો :-

સામગ્રી :-
અંજીર -100 ગ્રામ
દેશી ઘી - 4 ચમચા
ખાંડ - 3 ચમચા
ઈલાયચી પાઉડર - 2 ચપટી
બદામ - 10 થી 12 નંગ
પાણી - 1 કપ

રીત :-
       સૌ પ્રથમ બદામને અડધો કલાક માટે પાણીમાં પલાળવી, હવે કૂકરમાં અંજીર લેવા અને તેમાં 3/4 કપ પાણી નાખી તેને ફાસ્ટ ગેસ પર બાફવા મુકવા, કુકરમાં એઈર ભરાય એટલે ગેસ બંધ કરવો, સીટી ના થવા દેવી, હવે કૂકરને ઠંડુ થવા દેવાની રાહ જોવી, કૂકરમાંથી બાફ નીકળી જાય પછી જ ઢાંકણ ખોલવું, ત્યારબાદ આ બાફેલ અંજીરનું પાણી દુર કરી, તેને મિક્સર જારમાં લઇ સ્મૂથ પેસ્ટ તૈયાર કરવી, હવે પલાળેલ બદામની છાલ ઉતારી તેને નટ કટર વડે કટ કરી તેની છીણ તૈયાર કરવી, ત્યાર બાદ એક વાસણમાં ઘી ગરમ કરવા મુકવું, તેમાં બદામની છીણ નાખી તેને બે મિનીટ સાંતળી લેવી, હવે તેમાં અંજીરની પેસ્ટ, 1/4 કપ પાણી અને ખાંડ નાખી તેને હલાવતા જઈ તેમાંનું પાણી બળે ત્યાં સુધી હલાવો કુક કરવો,  પાણી  બળતા લગભગ દસેક મિનીટ થશે, ત્યારબાદ ગેસ બંધ કરવો, તેમાં ઈલાયચી પાઉડર ભભરાવવો, છેલ્લે તેને સર્વિંગ બાઉલમાં લઇ બદામની છીણ વડે ગાર્નીશ કરવો, એકદમ ટેસ્ટી અંજીર હલવો તૈયાર।

Read More

અવિયલ [કેરાલા] - Avial

                                                                                               

અવિયલ [કેરાલા] :-

સામગ્રી :-
ગાજર - 2 નંગ
દુધી - 200 ગ્રામ
મોટું કાચું કેળુ - 1 નંગ
ફણસી - 10 થી 12 નંગ
સૂરણ - 1 કપ
છીણેલું તાજુ નાડીયલ - 1 કપ
લીલા મરચા - 2 નંગ
ડુંગળી - 1 નંગ
કોપરેલ  તેલ - 1 ચમચો
દહીં - 1/2 કપ
મીઠું - સ્વાદપ્રમાણે
હળદર - 1/4 ચમચી
લાલ મરચું - 1/2 ચમચી
પાણી - 1/2 કપ

રીત :-
     સૌ પ્રથમ સુરણ, ગાજર, દુધી, કાચું કેળું અને ફણસીને આશરે 2 ઇંચ લાંબા, પાતળા ચોરસ ટુકડામાં કાપી લો, હવે એક વાસણમાં કોપરેલ તેલ ગરમ કરવા મુકવું, તેમાં બધા સમારેલ શાક નાખી બે મિનીટ હલાવતા જઈ સાંતળવા, હવે તેમાં પાણી, હળદર અને લાલમરચું નાખી હલાવી લેવું, વાસણમાં ઢાંકણ ઢાકી શાકને ધીમાતાપે અધકચરા બાફવા, હવે નાડીયલનું તાજુ છીણ, 2 લીલા મરચાના કટકા કરી લેવા અને ડુંગળીને ઝીણી સમારી લેવી, આ ત્રણેય વસ્તુ મિક્સર જારમાં લઇ અધકચરી વાટી પેસ્ટ તૈયાર કરવી, હવે આ પેસ્ટને બાફવા મુકેલ શાકમાં ઉમેરી હલાવી લેવું, ફરી તેને ઢાંકી 2 મિનીટ પકાવવું, છેલ્લે તેમાં દહીં ઉમેરી 2 મિનીટ કુક થવા દઈ, ગેસ બંધ કરવો , કેરાલામાં તહેવાર દરમ્યાન બનતી લોકપ્રિય ટેસ્ટી અને હેલ્ધી વાનગી અવિયલ તૈયાર।

Read More

વેજ કોલ્હાપુરી - Veg kolhapuri

                                                               

વેજ કોલ્હાપુરી :-

સામગ્રી :-
વટાણા - 50 ગ્રામ
ગાજર - 100 ગ્રામ
ફણસી - 100 ગ્રામ
ફ્લાવર - 150 ગ્રામ
ડુંગળી - 4 નંગ 
કોળું અથવા બટાકા - 1 કપ 
ટમેટા - 3 નંગ
લાલ મરચા આખા  - 2 નંગ ગાર્નીશ કરવા
કેપ્સીકમ - 1 નંગ
આદુની પેસ્ટ - 1 ચમચી
લસણની પેસ્ટ - 1ચમચી અને 10 કળી લસણ ઝીણા સમારેલ
કાજુની પેસ્ટ - 2 ચમચી
કાશ્મીરી લાલ મરચાની પેસ્ટ- 2 ચમચી
તેલ - તળવા માટે + 2 ચમચા વઘાર માટે
બટર - 3 ચમચી
લીલા મરચા - 2 નંગ

તમાલપત્ર - 2 નંગ 
મરી - 2 નંગ
તજ - 2 નંગ
લવિંગ - 2 નંગ
ઈલાયચી - 2 નંગ ફોલીને પાઉડર કરવો

ગરમ  મસાલો -1 ચમચી
કસુરી મેથી - 1/2 ચમચી
પંજાબી ગરમ મસાલો
હળદર - 1/4 ચમચી
લાલ મરચું - 1/2 ચમચી
મીઠું - સ્વાદમુજબ
લીંબુ - ફાડ કરી સર્વ કરવા


રીત :-
       સૌ પહેલા ફ્લાવર, કોળું, ફણસી, અને ગાજરના 1 ઇંચ જેટલા ચોરસ ટુકડા કરી લેવા અને તેને તેલ ગરમ કરી તેમાં તેલડૂબ તળી લેવા [ડીપફ્રાય ], સબ્જીનો થોડો કલર બદલે તેટલી વાર જ તળવી, તેમાં પંજાબી ગરમ મસાલો  અને કસુરી મેથી ભભરાવવી, હવે બે ડુંગળીને સમારી તેને થોડા તેલમાં બ્રાઉન કલરની થાય ત્યાં સુધી સાંતળીને ઠંડી કરી મીક્ષરમાં તેની પેસ્ટ કરી લેવી, હવે 1 ડુંગળીને ઝીણી સમારી લેવી, ટમેટાની મિક્સર માં પ્યુરી બનાવી લેવી, હવે એક વાસણમાં 2 ચમચા તેલ ગરમ કરવું  તેમાં તજ, લવિંગ, મરી અને તમાલપત્ર નાખી શેકવા, ત્યારબાદ તેમાં સમારેલ ડુંગળી અને મીઠું નાખી તેને થોડીવાર સાંતળવી, હવે તેમાં ડુંગળીની તૈયાર કરેલ પેસ્ટ અને ટમેટાની પ્યુરી ઉમેરવી થોડું પાણી નાખવું, હવે તેમાં  લસણ ની પેસ્ટ, 1/2 ચમચી આદુની પેસ્ટ, કાશ્મીરી લાલ મરચાની પેસ્ટ અને કાજુની પેસ્ટ નાખવી,તેમાં હળદર, લાલ મરચું, ગરમ મસાલો ઉમેરવો, આ ગ્રેવીને બે મિનીટ કુક થવા દેવી, હવે 1 ડુંગળી, કેપ્સીકમ અને 2 લીલા મરચાને 1 ઇંચના ચોરસ ટુકડામાં કાપી લેવા, તેને  એક વાસણમાં તેલ ગરમ કરી તેમાં નાખવા, આદુની પેસ્ટ અને સમારેલ લસણ નાંખી સહેજ ઉછાળતા જઈ[ ટોસ કરી] આ બધું સાંતળી લેવું તેમાં તૈયાર કરેલ ગ્રેવી અને તળેલ સબ્જી ઉમેરવી, છેલ્લે 3 ચમચી બટર નાખી હલાવીને ગેસ બંધ કરવો, તેને લાલ મરચા અને લીંબુની ફળ સાથે સર્વ કરવું, ટેસ્ટી વેજ  કોલ્હાપુરી તૈયાર।

Read More

બાસુંદી - Basundi

                                                                    

બાસુંદી :-

સામગ્રી :-
દૂધ - 1 લીટર
ખાંડ - 100 ગ્રામ
બદામ - 12 થી 15 નંગ
પિસ્તા - 12 થી 15 નંગ
કાજૂ - 12 થી 15 નંગ
ઈલાયચી - 5 નંગ
જાયફળનો પાઉડર - 1 ચપટી
થોડું કેસર

રીત :-
         સૌ પ્રથમ બદામ, પિસ્તા  અને કાજૂના નાના ટુકડા કરી લેવા, ઈલાયચી ફોલી તેનો પાઉડર કરી લેવો, હવે એક વાસણમાં ઘી લગાડી દૂધ ગરમ કરવા મૂકવું, તે તળિયામાં ચોંટે નહિ તે માટે તેને સતત હલાવ્યા કરવું, દૂધ ઉકળીને ઘટ્ટ થાય એટલે તેમાં ખાંડ ઉમેરવી, દૂધ એટલું ઘટ્ટ કરવું કે તેમાં રહેલ ક્રીમ વાસણની સાઈડમાં ચોટવા લાગે, હવે તેમાં કટ્ટ કરેલા ડ્રાયફ્રુટ નાખવા, પાંચેક મિનીટ ફરી  હલાવતા જઈ દૂધ ઉકાળવું, હવે ગેસ બંધ કરી તેમાં ઈલાયચી અને જાયફળનો પાઉડર  નાખવો, છેલ્લે કેસર ઉમેરવું, બાસુંદી તૈયાર, બાસુંદી ગરમ અથવા ફ્રીઝમાં ઠંડી કરેલ બન્ને રીતે ખાઈ શકાય છે, તે બહું સ્વાદિષ્ટ લાગે છે।

Read More

ફ્રૂટ સલાડ - Fruit salad

                                                                     

ફ્રૂટ સલાડ :-

સામગ્રી :-
ફૂલ ક્રીમ દૂધ - 1 લીટર
કસ્ટર્ડ પાઉડર - 1 ચમચો
ખાંડ - 100 ગ્રામ
સ્ટ્રોબેરી - 100 ગ્રામ
કેળા - 1 નંગ
સફરજન - 1 નંગ
ચીકુ - 2 નંગ
હાફૂસ કેરી - 1 નંગ
ક્રીમ અથવા
આઈસ્ક્રીમ
[ સીઝન પ્રમાણે ફ્રુટ લઇ શકાય ]

રીત :-
          સૌ પહેલા એક વાસણમાં ઘી લગાડી તેમાં દૂધ ગરમ કરવા મુકવું, કસ્ટર્ડ પાઉડરને એક ચમચા જેટલા ઠંડા દુધમાં ઓગાળી ઉકાળવા મુકેલ દુધમાં નાખવો, ખાંડ નાખવી અને સતત દુધને હલાવતા રહેવું દુધમાં બે ત્રણ ઉભરા આવે એટલે ગેસ બંધ કરવો અને દુધને ઠંડુ થવા દેવું, હવે બધા ફળને એકસરખા માપમાં સમારી લેવા , તેને ઠંડા કરેલા દુધમાં ઉમેરવા, છેલ્લે ક્રીમ અથવા આઈસ્ક્રીમ નાખવો, તેમાં પણ કેસર આઈસ્ક્રીમ નાખવાથી ફ્રુટ સલાડ ખુબજ ટેસ્ટી લાગશે।

Read More

મેથી પાપડનું શાક - Methi papad nu shak

                                             
મેથી પાપડનું શાક :-

સામગ્રી :-
મેથીદાણા  - 100 ગ્રામ
મોટા પાપડ - 2 નંગ
તેલ - 1 ચમચો
મીઠું - સ્વાદાનુસાર
હળદર - 1/4 ચમચી
લાલમરચું - 1 ચમચી
ધાણાજીરું - 1 ચમચી
ગરમ મસાલો - 1/4 ચમચી
ખાંડ - 1 ચમચી
લીંબુ - અડધું
રાઈ - 1/2 ચમચી
જીરું - 1/2 ચમચી

રીત :-
        સૌ પ્રથમ મેથીને તે ડુબે તેટલું પાણી નાખી અડધો કલાક પલાળવી, ત્યારબાદ તેને પાણી સાથે જ બાફી લેવી , હવે એક વાસણમાં તેલ ગરમ કરવું, તેમાં રાઈ અને જીરું નાખવા તે તતડે એટલે તરત તેમાં બાફેલા મેથીદાણા નાખવા, તે ડુબે તેટલું પાણી નાખી તેમાં મીઠું, ખાંડ, હળદર, ધાણાજીરું અને ગરમ મસાલો નાખી હલાવવું , તે ઉકળે એટલે તેમાં પાપડના નાના ટુકડા કરી નાખવા, એકાદ મિનીટ બાદ ગેસ બંધ કરવો, લીંબુનો રસ નાખી હલાવી લેવું, તૈયાર છે સ્વાદીષ્ટ મેથી પાપડનું શાક.

Read More

આલુમટર - Aalumatar

                                                  

                  
આલુમટર :-

સામગ્રી :-
બટાકા - 200 ગ્રામ
વટાણા - 400 ગ્રામ
ડુંગળી - 2 નંગ
ખસખસ - 1 ચમચો
આખા ધાણા - 1 ચમચો
ઈલાયચી - 6 નંગ
મરી - 6 નંગ
બદામ - 4 નંગ
તજ - 3 નંગ
લવિંગ - 6 નંગ
તેલ - 3 ચમચા
ઘી - 1 ચમચો
ટમેટા - 150 ગ્રામ
મીઠું - સ્વાદાનુસાર
ગરમ મસાલો - 1 ચમચી
લાલ મરચું - 1 ચમચી
કોથમીર - 1/2 ઝૂડી

રીત :-
        સૌ પહેલા બટાકાને છોલી તેના અંદાજે 1 ઇંચના ચોરસ ટુકડા કરવા, પછી તેને તેલ ગરમ કરી ગોલ્ડન બ્રાઉન કલરના થાય ત્યાં સુધી તળી લેવા, વટાણાને અલગ બાફી લેવા, ડુંગળીઅને કોથમીરને ઝીણી સમારી લેવી, હવે બદામ, તજ, લવિંગ, ખસખસ, ધાણા, મરી, ઈલાયચી વાટી સુકી પેસ્ટ તૈયાર કરવી, ટમેટાની ગ્રેવી તૈયાર કરી લેવી, ત્યારબાદ એક વાસણમાં તેલ અને ઘી ગરમ કરવા, તેમાં ડુંગળી સાંતળી લેવી, તેમાં ટમેટાની ગ્રેવી નાખી બે મિનીટ કુક કરવી, હવે તેમાં તૈયાર કરેલ સુકી પેસ્ટ ઉમેરવી, બાકીનો મસાલો ઉમેરવો, હલાવીને થોડું ઉકાળવા દેવું, પછી તેમાં વટાણા અને તળેલા બટાકાના ટુકડા અને થોડું પાણી નાખવું, રસો ઘટ્ટ થાય એટલે ગેસ બંધ કરવો, કોથમીર વડે ગાર્નીશ કરવું, ટેસ્ટી પંજાબી સબ્જી આલુમટર તૈયાર।

Read More

કાજુ ખોયા - kaju khoya

                                                     

કાજુ ખોયા :-

સામગ્રી :-
કાજુ - 200 ગ્રામ
પનીર - 100 ગ્રામ
દહીં - દોઢ કપ
ઘી - 2 ચમચા
મલાઈ - 2 ચમચા
ખસખસ - 20 થી 25 ગ્રામ
ડુંગળી - 2 નંગ
મીઠું - સ્વાદાનુસાર
હળદર - 1/4 ચમચી
ધાણાનો પાઉડર
લીલા મરચા - 2 નંગ
લસણ - 8 કળી
આદું - નાનો કટકો
સુકા મરચા - 2
લવિંગ અને તજ - 2 નંગ
કોથમીર - 1/2 ઝૂડી

રીત :-
         સૌ પ્રથમ આદુ,લસણ, લીલા મરચા , સુકા મરચા, તજ, લવિંગ, ધાણા પાઉડર, 1 ડુંગળી, કોથમીર આ બધું સાથે વાટીને તેની પેસ્ટ તૈયાર કરવી, હવે બીજી ડુંગળીને ઝીણી સમારી લેવી, ત્યારપછી 100 ગ્રામ કાજુ અને ખસખસને થોડા પાણીમાં અડધો કલાક પલાળી તેની પણ પેસ્ટ તૈયાર કરવી બાકીના કાજુના નાના ટુકડા કરી લેવા, હવે એક વાસણમાં ઘી ગરમ કરવા મુકવું, તેમાં સમારેલ  ડુંગળી સાંતળી લેવી, હવે તેમાં આદુ મરચાવાળી તૈયાર કરેલી પેસ્ટ ઉમેરવી, થોડીવાર તેને સાંતળીને તેમાં કાજુની પેસ્ટ, દહીં, મીઠું, હળદર, ખાંડ અને થોડું પાણી નાખવું, આ બધું ઉકળે એટલે તેમાં કાજુના કટકા અને પનીરને હાથ વડે છુટું કરી તેમાં ઉમેરવું, તેને હલાવી ગેસ બંધ કરવો, મલાઈ વડે ગાર્નીશ કરવું, તો તૈયાર છે ટેસ્ટી પંજાબી સબ્જી કાજુ ખોયા।

Read More

છોલે - ચણા મસાલા - panjabi chhole

                                                                     
છોલે - ચણા મસાલા :-

સામગ્રી :- 
તજ લવિંગનો પાઉડર - 1/4 ચમચી
આદું મરચા લસણની પેસ્ટ - 1 ચમચી
ગરમ મસાલા પાઉડર - 1/2 ચમચી
કાશ્મીરી લાલ મરચું - 1/2 ચમચી
મીઠું - સ્વાદાનુસાર
હળદર - 1/4 ચમચી
છોલે મસાલા પાઉડર - 2 ચમચી
જીરૂ - 1/2 ચમચી
લીંબુ - અડધું
તેલ - 4 ચમચી
ટમેટા - 4 નંગ
ડુંગળી - 3 નંગ
છોલે ચણા - 1 કપ
કોથમીર - ગાર્નીશિંગ  માટે

રીત :-
          સૌ પ્રથમ ચણાને 12 કલાક એટલે કે આખી રાત પાણીમાં પલાળવા, હવે તેમાં ચપટી સોડા નાખી અને 4 કપ પાણી ઉમેરી કુકરની ચાર સીટી વગાડી ચણા બાફી લેવા,  તેનું પાણી દુર કરી નાખવું, હવે ડુંગળી અને કોથમીરને ઝીણી સમારી લેવી, ટમેટાને મિક્સરમાં પીસી તેની પ્યુરી તૈયાર કરી લેવી, ત્યારબાદ એક વાસણમાં તેલ ગરમ કરવું તેમાં જીરું શેકી લેવા, પછી તેમાં તજ લવિંગનો પાઉડર નાખી તરત જ આદુ, મરચા, લસણની પેસ્ટ ઉમેરી હલાવી લેવું, હવે તેમાં સમારેલ ડુંગળી અને મીઠું નાખવું, ડુંગળી ગોલ્ડન બ્રાઉન કલરની થાય પછી તેમાં ટમેટાની પ્યુરી ઉમેરવી, અને બધા મસાલા ઉમેરવા એટલે કે હળદર, ગરમ મસાલો, કાશ્મીરી લાલ મરચું, છોલે મસાલા પાઉડર ઉમેરી હલાવી લેવું, આ બધું બે મિનીટ કુક થવા દેવું, હવે તેમાં ચણા ઉમેરી ફરી બે મિનીટ કુક કરવું, હવે ગેસ બંધ કરી છોલેમાં લીંબુનો રસ ઉમેરવો અને કોથમીર વડે ગાર્નીશ કરવું, તૈયાર છે ટેસ્ટી પંજાબી છોલે મસાલા।

Read More

વેજ સ્ટોક - vegetable stock

                                                          

વેજ સ્ટોક :-                                                               

સામગ્રી :-

મરી - 7 થી 8 દાણા
લીલું મરચું - 1 નંગ
તમાલપત્ર - 2 નંગ
ડુંગળી - 2 નંગ
લીલી ડુંગળી - 3 નંગ
ગાજર - 1 નંગ
કોબી - 4 થી 5 મોટા ટુકડા
ફ્લાવર - 4 થી 5 મોટા ટુકડા

રીત :-
        સૌ પહેલા બધા શાકને વ્યવસ્થિત ધોઈને તેને  મોટા ટુકડામાં સમારી લેવાં, હવે એક વાસણમાં બધા શાક લઇ તેમાં મરી, તમાલપત્ર , ને લીલું મરચું ઉમેરવું, હવે આ બધા શાક ડુબે એટલું પાણી નાખી ઢાંકણ બંધ કરી તેને પાંચ મિનીટ ફાસ્ટ ગેસ પર કુક કરવું ત્યારબાદ ફ્લેમ ધીમી કરી 20 મિનીટ બાફવું, હવે ગેસ બંધ કરી સ્ટોક નું  પાણી ઠંડુ થવા દો , સ્ટોક ઠંડો થાય એટલે તેને રસ ગાળવાની મોટી ગળણી વડે ગાળી લેવો, આ સ્ટોકને હવાચુસ્ત જારમાં બંધ કરી ફ્રીઝરમાં રાખવાથી એક થી બે અઠવાડિયા સુધી  તેનો ઉપયોગ કરી શકાય અને જયારે તેનો ઉપયોગ કરવો હોય ત્યારે એક કલાક પહેલા ફ્રીઝર માંથી તેને બહાર કાઢી લેવો , તો તમે પણ વેજ સ્ટોક બનાવો ને વિવિધ રેસીપીમાં તેનો ઉપયોગ કરો.

Read More