બાજરીના રોટલા : Bajarina Rotla

બાજરીના રોટલા :

સામગ્રી :
બાજરીનો લોટ : 2 કપ
પાણી : 3/4 કપ
મીઠું : સ્વાદાનુસાર
ઘી : ઈચ્છા પ્રમાણે

રીત :
           સૌ પ્રથમ બાજરીના લોટને એક વાસણમાં ચાળી લેવો, હવે તેમાં મીઠું નાખીને ધીમે ધીમે પાણી નાખતા જઈને લોટ બાંધવો, હવે આ લોટને હથેળી વડે વજન આપતા જઈ પાંચેક મિનીટ મસળવો, ત્યારબાદ તેમાંથી સરખે ભાગે લુવા તૈયાર કરવા, મધ્યમ સાઈઝના ચાર લુવા તૈયાર થશે, હવે ગેસ પર માટીની તાવડી કે તવો ગરમ કરવા મુકવો, લુવાને બાજરીના લોટમાં રગદોળીને પાટલા પર રાખી એકદમ હળવે હાથે ભાખરીથી સહેજ જાડો રોટલો વેલણ વડે વણવો, ગરમ તાવડી પર મુકવો , એક બાજુ શેકાઈ એટલે તવેથા વડે રોટલો ઉખાડીને બીજી બાજુ શેકવો, ત્યારબાદ જે ભાગ કાચો હોય ત્યાજ ફેરવીને શેકી લઇ ઉતારવો, ફૂલકા રોટલી જેમ પણ રોટલાને ફુલાવી શેકી શકાય , બધા રોટલા તૈયાર કરી તેની પર ઘી લગાવી લેવું।
 

Read More

નાન ખટાઈ - Naan khatai

નાન ખટાઈ :-

સામગ્રી :-
ઘી અથવા માખણ - 1/2 કપ
ખાંડનો પાઉડર - 1/2 કપ
મેંદો - 1/2 કપ
સુજી - 1/4 કપ
ચણાનો લોટ - 1/4 કપ
ઈલાયચી પાઉડર - 1 ચપટી [ પીંચ ]
બેકિંગ પાઉડર - 1/2 ચમચી

રીત :-
           સૌ પ્રથમ એક વાસણમાં ઘી લેવું, જો માખણ લેવું હોય તો તે મીઠા વગરનું અને રૂમ ટેમ્પરેચર પર લાવી ઉપયોગમાં લેવું, હવે તેમાં ખાંડનો પાઉડર ઉમેરી ફીણવું, આ બન્નેનો કલર ચેન્જ થઈને એકદમ પ્લફી મિશ્રણ તૈયાર થાય ત્યાં સુધી ફીણવું, હવે મેંદો, સુજી,ચણાનો લોટ અને બેકિંગ પાઉડરને મિક્સ કરી એક વાસણમાં એકથી બે વાર ચાળી લેવા, હવે તેને ફીણેલ ઘી ખાંડના મિશ્રણમાં ધીમે ધીમે નાખતા જઈ શાથે ઈલાયચી પાઉડર ઉમેરી બધું ભેગું કરી રોટલીના લોટ જેમ બાંધી લેવું, જરૂર પડે તો એક ચમચી દહીં ઉમેરવું, હવે આ લોટને હવાચુસ્ત ડબામાં ભરી 10 મિનીટ માટે રેસ્ટ આપવો, ત્યારબાદ તેને થોડો મસળી લેવો, હવે બેકિંગ ટ્રેમાં થોડું ઘી લગાવવું, [ ગ્રીઝ કરવું ] અને લોટમાંથી એક એક ચમચી જેટલા લુવા લઇ ગોળા તૈયાર કરી ટ્રેમાં છુટ્ટા ગોઠવવા જેથી નાનખટાઈ ફૂલે ત્યારે તેનો આકાર ના બદલાય, હવે ઓવનને 180 સેન્ટીગ્રેડ પર પ્રી હીટ કરી અને આ જ તાપમાન પર 15 મિનીટ માટે નાન ખટાઈ બેક કરવી। 

Read More

હોટ એન્ડ સાર સૂપ - Hot and sour soup

હોટ એન્ડ સાર સૂપ :-

સામગ્રી :-
છીણેલ ડુંગળી - 1 નંગ
છીણેલ આદુ - 1 ઈંચનો ટુકડો
બારીક સમારેલ લસણની કળી - 5 થી 6 નંગ
છીણેલ કોબીજ - 1/4 નંગ
છીણેલ ગાજર - 1/2 નંગ
બારીક સમારેલ લીલી ડુંગળી - 1 નંગ
બારીક સમારેલ ફણસ - 3 નંગ
બારીક સમારેલ મશરૂમ - 1 નંગ
બારીક સમારેલ કેપ્સીકમ - 1/2 નંગ
તેલ - 2 ચમચા
કોર્નસ્ટાર્ચ - 1 ચમચો
સોયાસોસ - 2 ચમચા
રેડ અથવા ગ્રીન ચીલી સોસ - 2ચમચા
ખાંડ - 1/2 ચમચી
આજીનો મોટો - 1/4 ચમચી
વેજીટેબલ સ્ટોક અથવા પાણી - 5 કપ
વિનેગર - 2 ચમચા
સફેદ મરી પાઉડર - 1/2 ચમચી
મીઠું - સ્વાદાનુસાર

રીત :-

         સૌ પ્રથમ એક વાસણમાં તેલ ગરમ કરવું, તેમાં સમારેલ લસણ, છીણેલ આદુ અને ડુંગળી નાખી સાંતળવું, હવે તેમાં સોયાસોસ, મીઠું, આજીનો મોટો, છીણેલ ગાજર,બારીક સમારેલ લીલી ડુંગળી, ફણસ અને મશરૂમ નાખી  ત્રણ મિનીટ સાંતળવું, હવે તેમાં વેજીટેબલ સ્ટોક નાખી હલાવી, છીણેલ કોબીજ, સમારેલ કેપ્સીકમ, ખાંડ અને ચીલીસોસ નાખવો, ત્યારબાદ કોર્નસ્ટાર્ચમાં બે ચમચા જેટલું પાણી ઉમેરી હલાવી સૂપમાં નાખવું, સૂપ હલાવતા જઈને થોડીવાર ઉકાળવું, થોડો કલર ચેન્જ લાગે એટલે વિનેગર નાખી, હલાવીને ગેસ બંધ કરવો, ગરમા ગરમ હોટ એન્ડ સાર  સૂપની ની મજા માણવી।
           

Read More

દહીં વડા - Dahivada

દહીં વડા :-

સામગ્રી :-
અડદની દાળ - 1 કપ
ફીણેલ ઠંડું દહીં - 2 કપ
છાશ અથવા પાણી - 2 કપ
તેલ - તળવા માટે
જીરૂં પાઉડર - 2 ચમચી
લાલ મરચા પાઉડર - 2 ચમચી
જીરૂં - 1 ચમચી
મીઠું - સ્વાદાનુસાર
હિંગ - 1/2 ચમચી
સંચળ - સ્વાદાનુસાર
આમલી ખજુરની ચટણી - 2 ચમચા

રીત :-
               સૌ પ્રથમ અડદની દાળને ધોઈ અને ચાર કલાક પાણીમાં પલાળવી, ત્યારબાદ તેનું પાણી દુર કરી તેને મિક્સરમાં લઇ બે ચમચી જેટલું પાણી નાખી સ્મૂથ પેસ્ટ તૈયાર થાય તેમ પીસી લેવી, હવે આ પેસ્ટને એક વાસણમાં લઇ,તેમાં જીરું, મીઠું, સંચળ, હિંગ નાખી એકદમ હલાવી લેવી, હવે એક વાસણમાં તેલ લઇ તેને ધીમા તાપમાન પર ગરમ કરવું, તેલ થોડું ગરમ થાય એટલે ચમચીમાં પેસ્ટ લઇ બીજી ચમચીની મદદથી વડું તેલમાં નાખતા જવું, આ રીતે  વડા  તળવા માટે નાખવા, હવે ગેસ થોડો મધ્યમ તાપમાં કરવો, વડાને હલાવતા જઈને તેને ગોલ્ડન બ્રાઉન કલરના થાય ત્યાં સુધી તળી લેવા, હવે વડાને છાસમાં પાંચ થી સાત મિનીટ પલાળવા, ત્યારબાદ તેને ધીમેથી નીચોવી પીરસવાના વાટકામાં ગોઠવવા, ઠંડા દહીંમાં થોડું મીઠું નાખીને વડા પર ચમચી વડે જરૂર મુજબ રેળવું, ઉપર ખજુર આમલીની ચટણી રેળવી, ત્યારબાદ તેમાં  લાલ મરચા પાઉડર અને જીરું પાઉડર ભભરાવી પીરસવા, ટેસ્ટી દહીંવડા તૈયાર। [ દહીંવડા પીરસવામાં   લીલી ચટણી પણ નાખી શકાય ]

Read More

મલાઈ કોફ્તા - Malai kofta

                                                  

મલાઈ કોફ્તા :-

કોફ્તા માટેની સામગ્રી ;-
પનીર - 1 કપ
માવો - 1/2 કપ
કોર્નફ્લોર - 40 ગ્રામ
કાજૂ - 8 થી 10 નંગ
કિસમિસ - 1 ચમચો
ઈલાયચી - 2 નંગ , પાઉડર કરવો
મરી પાઉડર - 2 ચપટી
મીઠું - સ્વાદાનુસાર
તેલ - તળવા માટે

વ્હાઈટ ગ્રેવી માટેની સામગ્રી :-
તેલ - 2 ચમચા
કાજૂ - 50 ગ્રામ 
મગજતરીના બી - 50 ગ્રામ
ફ્રેશ ક્રીમ - 1 કપ
દહીં - 1/2 કપ
સમારેલ કોથમીર - 2 થી 3 ચમચા
જીરું - 1/2 ચમચી
કાળા મરી - 5 થી 6 નંગ
લવિંગ - 2 નંગ
તજ - 1 ટુકડો
આદુની પેસ્ટ - 1/2 ચમચી
સમારેલ લીલા મરચા - 2 નંગ
ધાણા પાઉડર - 1/2 ચમચી
મીઠું -સ્વાદાનુસાર
લાલ મરચા પાઉડર - 1 ચમચી
બટર - 1 ચમચી

રીત :-
         સૌ પ્રથમ 50 ગ્રામ  કાજુ અને 50 ગ્રામ મગજતરીના બીને બે કલાક પાણીમાં પલાળી તેની પેસ્ટ તૈયાર કરી લેવી, હવે પનીર અને માવાને એક વાસણમાં છીણી લેવું, તેમાં અડધો કોર્નફલોર નાખીને તેને એકદમ મસળવું, હવે તેમાં મીઠું અને મરી પાઉડર નાખી તેને લોટની જેમ બાંધી લેવું, હવે કોફતા માં ભરવા માટે કાજુના ટુકડા કરી તેમાં કિસમિસ અને ઈલાયચી પાઉડર નાખવા, હવે બાંધેલ લોટમાંથી નાના લીંબુ જેટલો લુવો લઇ તેને ગોળ આકાર આપી તેમાં ખાડો કરી કાજૂ - કિસમિસ વાળો થોડો મસાલો ભરી કોફ્તું બંધ કરી,ગોળ કરીને કોર્નફલોરમાં રગદોળી લેવું, બધા કોફતા તૈયાર કરી તેને ધીમા તાપે તેલ ડૂબ નાખી ગોલ્ડન કલરના તળવા, તળતી વખતે કોફતાને બહુ હલાવવા નહી તેની ઉપર ગરમ તેલ રેડતા જઈ તળવા, હવે કોફતા વઘારવા માટે વ્હાઈટ ગ્રેવી તૈયાર કરવી આ માટે એક વાસણમાં તેલ ગરમ કરવું, તેમાં જીરું શેકવું, મરી, તજ અને લવિંગને અધકચરા વાટીને વઘારમાં નાખી શેકવા, હવે આદુની પેસ્ટ અને સમારેલ લીલા મરચા નાખી હલાવી કાજૂ-મગજતરી ની તૈયાર કરેલ પેસ્ટ નાખવી તેને હલાવતા જઈ બે ત્રણ મિનીટ પકાવવી, તેલ ઉપર દેખાય એટલે ફ્રેશ ક્રીમ નાખી હલાવતા જવું તે થોડું પકાવી તેમાં દહી હલાવીને નાખવું, હલાવતા જવું જેથી ક્રીમ ફાંટે નહી, હવે ધાણા પાઉડર, લાલ મરચા પાઉડર અને થોડું પાણી નાખી ગ્રેવી હલાવતા જવી ગ્રેવી ઉપર તેલ દેખાય એટલે તેમાં મીઠું, ખાંડ,બટર  અને થોડી કોથમીર નાખી તેને ધીમા તાપે બે મિનીટ હલાવી ગેસ બંધ કરવો, હવે પીરસતી વખતે જ ગ્રેવીમાં કોફતા ઉમેરવા, નાન કે પરોઠા સાથે પીરસવા।

Read More

દાળ ઢોકળી Dal dhokari

દાળ ઢોકળી :-

ઢોકળી માટેની સામગ્રી :-
ઘઉંનો લોટ - 1/2 કપ
ચણાનો લોટ - 1 ચમચો
તેલ - 1 ચમચો
અજમો - 1/4 ચમચી
હળદર - 1/4 ચમચી
મીઠું - સ્વાદાનુસાર
લાલ મરચા પાઉડર - 1/2 ચમચી

દાળ માટેની સામગ્રી :-
તુવેર દાળ - 1/2 કપ
કાચા સિંગદાણા - 2 ચમચા
પાણી - 2 કપ દાળ બાફવા + 4 કપ દાળ વઘારવા 
બાકીની સામગ્રી ગુજરાતી દાળની લેવી
[ ગુજરાતી દાળની રેસીપી મુકેલ છે ]

રીત :-
        સૌ પ્રથમ તુવેરદાળને ધોઈ અને અડધો કલાક પલાળવી, ત્યારબાદ તેનું પાણી દુર કરી તેને કુકરમાં લઇ તેમાં 2 કપ પાણી ,મીઠું, બે ચમચા કાચા સિંગદાણા નાખીને ત્રણ સીટી કરવી, હવા નેચરલી નીકળવા દેવી, હવે ઢોકળીનો લોટ બાંધવા માટે એક વાસણમાં ઘઉંનો લોટ, ચણાનો લોટ, અજમો, મીઠું, હળદર, લાલ મરચા પાઉડર અને તેલ આ બધું લઇ થોડા પાણી વડે કઠણ લોટ બાંધવો, તેને ઢાંકીને રાખવો, હવે દાળને બ્લેન્ડ કરી તેમાં 4 કપ પાણી નાખી તેને વધારવી, દાળ થોડી ઉકળે એટલે ગેસ ધીમો કરી, ઢોકળીના લોટમાંથી લુવા કરી, તેની પર તેલ લગાવી પાતળી રોટલી તૈયાર કરવી, તેમાંથી ડાયમંડ શેપ ઢોકળી કટ કરી, તેને દાળમાં નાખવી, તેને ઉકાળીને પાકવા દેવી, થોડા સમયે હલાવવી, આ રીતે 20 થી 25 મિનીટમાં ઢોકળી પાકી જશે એટલે ગેસ બંધ કરી લીંબુનો રસ નાખવો, તેને સમારેલ કોથમીર અને ઉપર થોડું તેલ કે ઘી રેળી ભાત સાથે પીરસવી।  તે ખુબજ ટેસ્ટી લાગે છે.

Read More

ગુજરાતી કરી - Gujarati curry

ગુજરાતી કરી [ કઢી ] :-

સામગ્રી :-
ખાટુ દહીં - 1 કપ
ચણાનો લોટ - 3 ચમચા
પાણી - 2, 1/2 કપ
આદુ લીલા મરચાની પેસ્ટ - 1 ચમચી
મીઠો લીમડો - 7 થી  8 પાન
કોથમીર - 1/2 ઝૂળી, સમારી લેવી
તેલ - 2 ચમચી
ઘી - 1 ચમચી
લાલ સુકું મરચું - 1 નંગ
તજ - 1 ટુકડો
લવિંગ - 4 નંગ
મેથી દાણા - 1/4 ચમચી
રાઈ - 1/2 ચમચી
જીરું - 1/2 ચમચી
હિંગ - 1 ચપટી
મીઠું - સ્વાદાનુસાર
હળદર - 1 ચપટી
ખાંડ - 1 ચમચી અથવા સ્વાદ પ્રમાણે

રીત :-
          સૌ પ્રથમ એક વાસણમાં દહીં લઇ તેમાં ચણાનો લોટ , હળદર, મીઠું અને આદુ મરચાની પેસ્ટ ઉમેરી તેને સારી રીતે હલાવી અથવા બ્લેન્ડ કરી લોટના ગઠ્ઠા દુર કરવા, હવે એક વાસણમાં તેલ અને ઘી ગરમ કરવું, તેમાં રાઈ તતડાવી જીરું અને મેથી દાણા શેકવા, હવે તેમાં લીમડાના પાન અને હિંગ નાખી હલાવી અને દહી વાળુ મિશ્રણ ઉમેરવું, પાણી નાખવું અને હલાવતા જઈ કરી ઉકાળવી, ખાંડ નાખવી આઠેક મિનીટ આ રીતે ફાસ્ટ ગેસ પર કરી હલાવતા જઈ ઉકાળવી, છેલ્લે સમારેલ કોથમીર નાખી ગેસ બંધ કરવો, ગરમા ગરમ જ ખીચડી અથવા ભાત સાથે પીરસવી।  [ કરીમાં દહી ના સ્થાને ખાટી છાસ પણ વાપરી શકાય, ખાટી છાસ લેવી હોય તો 3 કપ લેવી, પાણી નાખવું નહિ.]
       

Read More

ઉત્તપમ - Uttapam

ઉત્તપમ :-

સામગ્રી :-
ઢોસાનું ખીરૂ - 500 ગ્રામ
ટમેટા - 2 નંગ , મધ્યમ
ડુંગળી - 2 નંગ , મધ્યમ
તેલ - જરૂર પ્રમાણે
કોથમીર - 1/2 ઝૂળી
ગરમ મસાલો - 2 ચમચી
મીઠું - જરૂર પ્રમાણે

રીત :-
       સૌ પ્રથમ ડુંગળી, ટમેટા અને કોથમીરને ઝીણા સમારી લેવા, ત્યારબાદ ઢોસાનું ખીરૂમાં મીઠું ઉમેરી હલાવી લેવું, હવે એક નોનસ્ટીક તવો ધીમા તાપે ગરમ કરવો, સહેજ તેલ લગાવી ખીરું નાખીને બહુ પાતળો ના રહે તેમ આશરે છએક ઇંચ જેટલો ઉત્તપમ ફેલાવવો, ત્યારબાદ તેની પર સમારેલ ટમેટા, ડુંગળી અને કોથમીરને ઈચ્છા મુજબ ભભરાવવા, બે ચપટી જેટલો ગરમ મસાલો છાંટવો, તેની પર સહેજ દબાણ આપવું, હવે ગેસ થોડો ફાસ્ટ કરવો, ઉપર થોડું તેલ નાખવું, ગોલ્ડન કલરનો થાય એટલે બીજી બાજુ ફેરવવો, તેને પણ ગોલ્ડન કલરનો શેકવો, બીજો ઉત્તપમ ફેલાવતા પહેલા ગેસ ધીમો કરી, તવા પર  પાણી છાંટી, કપડું ફેરવી થોડો ઠંડો કરવો, આ રીતે બધા ઉત્તપમ બનાવવા, તેને ચટણી, સાંભર કે ટોમેટો કેચપ સાથે પણ પીરસી શકાય।

Read More

ફૂલવડી - Fulvadi

ફૂલવડી :-

સામગ્રી :-
ચણાનો જાડો [ કરકરો ] લોટ - 100 ગ્રામ
દહીં - 50 ગ્રામ
આખા ધાણા - 1/2 ચમચી
આખા મરી - 10 નંગ
વરીયાળી - 1/2 ચમચી
તલ - 1/2 ચમચી
તેલ - 3 ચમચા + તળવા માટે
ખાંડ - 2 ચમચી
મીઠું - સ્વાદાનુસાર
હળદર - 2 ચપટી
લાલ મરચા પાઉડર - 1 ચમચી
ગરમ મસાલો - 1/2 ચમચી
ખાવાનો સોડા - 1 ચપટી

રીત :-
     સૌ પ્રથમ ફૂલવડીનો લોટ બાંધવો, આ માટે એક વાસણમાં ચણાનો જાડો લોટ, મીઠું, લાલ મરચું, હળદર, ગરમ મસાલો, ખાંડ, આખા ધાણા, આખા મરી, વરીયાળી, તલ, ખાવાનો સોડા અને  તેલ લેવું , હવે આ બધું સારી રીતે મિક્સ કરી દહીં વડે લોટ બાંધવો, તેને બે કલાક માટે ઢાંકીને રાખી દેવો, ત્યારબાદ ફૂલવડી તળવા માટે તેલ ગરમ કરવું, તેલ થોડું ગરમ થાય એટલે બાંધેલ લોટમાં બે ચમચી ઉમેરી લોટ મસળવો, હવે મોટા કાણાવાળો એક જારો લઇ તેની પર તેલ લગાડવું, જેથી લોટ જારાને બહુ ચોંટે નહી, હવે લોટ જારા પર લઇ, તેને અંદર થી બહાર તરફ ઘસવો, જેથી તેલમાં ફૂલવડી પડતી જશે, તેને ગોલ્ડન બ્રાઉન તળી લેવી, આ ફૂલવડીને તીખા, મીઠા દહીં સાથે ખાઈ શકાય, નાસ્તા તરીકે પણ ખાઈ શકાય, તે ખુબ સ્વાદિષ્ટ લાગે છે.

Read More

રગડા - Ragdo

રગડા :-

સામગ્રી :-
સૂકા વટાણા - 1 કપ
ડુંગળી - 2 નંગ
ટમેટા - 3 થી 4 નંગ
લીલું મરચું - 1 નંગ
કોથમીર - 1/2 ઝૂળી
આદુ લસણની પેસ્ટ - 1 ચમચી
તેલ - 3 થી 4 ચમચા
મીઠું - સ્વાદાનુસાર
લાલ મરચા પાઉડર - 1 ચમચી
હળદર - 1/2 ચમચી
ગરમ મસાલા - 1/2 ચમચી

રીત :-
            સૌ પ્રથમ સૂકા વટાણાને ધોઈ અને આખી રાત પલાળવા, ત્યારબાદ તેમાં મીઠું, ચપટી હળદર અને જરૂર પ્રમાણે પાણી નાખી કુકરમાં બાફવા,  ડુંગળી, લીલું મરચું, કોથમીર અને ટમેટાને ઝીણા સમારી લેવા, ત્યારબાદ એક વાસણમાં તેલ ગરમ કરવું, તેમાં આદુ લસણની પેસ્ટ નાખવી, તેને હલાવીને સમારેલ ડુંગળી નાખવી, તેમાં મીઠું, લાલ મરચા પાઉડર, ગરમ મસાલો, હળદર આ બધા મસાલા ઉમેરી ડુંગળી સાથે જ હલાવતા જઈ ડુંગળી સાંતળવી, હવે તેમાં સમારેલ મરચા અને ટમેટા ઉમેરવા, તેને હલાવતા જઈ બે મિનીટ પકાવવા, ત્યારબાદ તેમાં બાફેલ વટાણા અને થોડો ઘટ્ટ રસો રહે તેટલું પાણી ઉમેરવું, વાસણ ઢાંકીને બે થી ત્રણ મિનીટ પકાવવું, ત્યારબાદ ગેસ બંધ કરી સમારેલ કોથમીર વડે ગાર્નીશ કરવું, રગડો તૈયાર, તેને ગરમા ગરમ જ પેટીસ સાથે અથવા પાઉં કે રોટલી સાથે પીરસવો।

Read More

હાંડવો - Handwo

હાંડવો :-

સામગ્રી :-

ચોખા - 1/2 કપ
ચણાની દાળ - 1/4 કપ
મગની પીળી [yellow] દાળ - 1/4 કપ
અડદની દાળ - 1/4 કપ
છીણેલ ગાજર - 1/2 કપ
છીણેલ દુધી - 1 કપ
છીણેલ કોબીજ - 1/2 કપ
દહીં - 1/2 કપ
સમારેલ કોથમીર - 2 ચમચા
બેકિંગ સોડા - 3/4 ચમચી
મીઠું - સ્વાદાનુસાર
ખાંડ - 1 ચમચી
હળદર - 1/4 ચમચી
લાલ મરચા પાઉડર - 1/2 ચમચી
લીલા મરચા - 2 નંગ, ઝીણા સમારી લેવા
આદુ - 1 ઈંચનો ટુકડો, છીણી લેવો
લીંબુનો રસ - 2 ચમચી
તેલ - 4 ચમચા
મીઠો લીમડો - 8 થી 10 પાન
તલ - 2 ચમચી
રાઈ - 1 ચમચી
જીરું - 1 ચમચી
હિંગ - 1 થી 2 ચપટી

રીત :-
        સૌ પ્રથમ બધી દાળને સારી રીતે ધોઈ અને ચાર થી પાંચ કલાક માટે અલગ અલગ પલાળવી,  ત્યારબાદ તેનું પાણી દુર કરી બધી દાળને મિક્સરમાં થોડી કરકરી રહે તેમ પીસી લેવી, બધી દાળ સારી રીતે હલાવીને મિક્સ કરવી, હવે તેમાં છીણેલ ગાજર, દુધી અને કોબીજ ઉમેરી ચમચા વડે મિક્સ કરવું, ત્યારબાદ તેમાં,દહી, મીઠું, હળદર, લાલ મરચા પાઉડર, સમારેલ કોથમીર, છીણેલ આદુ અને લીંબુનો રસ નાખી ફરી હલાવી લેવું, હવે હાંડવાનો વઘાર તૈયાર કરવો, આ માટે એક વાસણમાં તેલ ગરમ કરવું તેમાં રાઈ નાખવી, રાઈ તતડે એટલે જીરું નાખી શેકવું, તલ નાખી તતડાવવા, સમારેલ લીલા મરચા અને મીઠો લીમડો નાખવો, છેલ્લે હિંગ નાખી ગેસ બંધ કરવો, હવે એક કેક બેક કરવાનું વાસણ અથવા ઓવનમાં ચાલે તેવું કોઈ પણ
મોટું, ઊંડું અને ગોળ વાસણને ચારે બાજુ એ તેલ લગાડવું [ ગ્રીઝ કરવું ], હવે તૈયાર કરેલ વઘાર માંથી અડધો વઘાર આ ગ્રીઝ કરેલ વાસણમાં રેળવો, ત્યારબાદ દાળ વાળા મિશ્રણમાં બેકિંગ સોડા નાખી તેને વ્યવસ્થિત મિક્સ કરી ગ્રીઝ કરેલ વાસણમાં રેળવો, હવે બાકીનો વઘાર ઉપર ચમચી વડે રેળી દેવો, ત્યારબાદ ઓવનને 200  ડીગ્રી સેન્ટીગ્રેડ પર પ્રી હિટ કરવું, તેજ તાપમાન પર 15 મિનીટ માટે હાંડવો બેક કરવો, હવે તેને ચપ્પુ વડે ચેક કરવો, જો ચપ્પુ કોરું બહાર ના આવે તો ફરી એજ તાપમાન પર 5 મિનીટ માટે બેક કરવો, આ રીતે હાંડવો ગેસ પર એક પાનમાં પણ બનાવી શકાય, હાંડવો તૈયાર।

Read More

રાજમા - Rajma.

રાજમા :-

સામગ્રી :-
રાજમા - 125 ગ્રામ
તેલ - 2 ચમચા
તમાલપત્ર - 2 નંગ
મોટી ઈલાયચી - 3 નંગ
ડુંગળી - 4 નંગ, મધ્યમ કદની
લીલા મરચા - 1 નંગ
લસણની પેસ્ટ - 1/2 ચમચો
આદુની પેસ્ટ - 1/2 ચમચો
ટમેટા - 3 નંગ, મધ્યમ કદના
મીઠું - સ્વાદાનુસાર
હળદર - 1/4 ચમચી
ધાણા પાઉડર - 1 ચમચી
કાશ્મીરી લાલ મરચા પાઉડર - 1/4 ચમચી
જીરું પાઉડર - 1/2 ચમચી
ગરમ મસાલો - 1/2 ચમચી
રાજમાં મસાલા પાઉડર - 2 ચમચી
કસૂરી મેથી - 1 ચમચો

રીત :-
              સૌ પ્રથમ રાજમાને ધોઈ અને આખી રાત પલાળવા, ત્યારબાદ તેને બાફી લેવા, તેનું પાણી રાખી મુકવું, ડુંગળીને ઝીણી સમારી લેવી, ટમેટાની પ્યુરી તૈયાર કરવી, લીલા મરચા સમારી લેવા, હવે એક વાસણમાં તેલ ગરમ કરવું, તેમાં તમાલપત્ર અને મોટી ઈલાયચીને આખી નાખવી, તેને એકાદ મિનીટ શેકવું,  ત્યારબાદ તેમાં સમારેલ ડુંગળી નાખી સાંતળવી,સમારેલ  લીલા મરચા,આદુઅને લસણની પેસ્ટ ઉમેરવી તેને થોડીવાર સાંતળવા દેવા , હવે ટમેટાની પ્યુરી ઉમેરી, મીઠું, હળદર, ધાણા પાઉડર, ગરમ મસાલો, જીરું પાઉડર, લાલ મરચા પાઉડર, રાજમા પાઉડર આ બધા જ મસાલા નાખવા, ટમેટાની પ્યુરીને બે મિનીટ હલાવીને પકાવવી, એટલે મસાલાનો ટેસ્ટ તેની સાથે યોગ્ય રીતે મળી જશે, હવે તેમાં બાફેલ રાજમા પાણી સાથે જ ઉમેરી દેવા અને કસૂરી મેથી નાખી હલાવીને ઢાંકણ ઢાંકી 15 મિનીટ માટે આ બધું ધીમા તાપે પકાવવું,  જરૂર પડે તો થોડું પાણી નાખી શકાય, ત્યારબાદ ગેસ બંધ કરવો, રાજમાને ગરમા ગરમ નાન કે પરોઠા સાથે પીરસવા।

Read More

બટાકા પૌઆ - BATAKA PAUVA

બટાકા પૌઆ :-

સામગ્રી :-
જાડા પૌઆ - 2 કપ
સમારેલ બટાકા - 1/2 કપ
સમારેલ ડુંગળી - 1/2 કપ
તેલ - 2 ચમચા
રાઈ - 1/2 ચમચી
જીરું - 1/2 ચમચી
હિંગ - 1 ચપટી
મીઠું - સ્વાદાનુસાર
હળદર - 1/2 ચમચી
આદુ મરચાની પેસ્ટ - 1 ચમચી
લીંબુનો રસ - 2 ચમચી
ખાંડ - 2 ચમચી
સમારેલ કોથમીર - 1, 1/2 ચમચો
દુધ - 2 ચમચી

રીત :-
         સૌ પ્રથમ પૌઆને એક ચારણી અથવા રસ ગાળવાની ગળણીમાં [સ્ટ્રેઈનરમાં ] ધોઈ લેવા, ત્યારબાદ એક વાસણમાં તેલ ગરમ કરવું, તેમાં રાઈ નાખવી તે તતડે એટલે જીરું અને હિંગ નાખવા, હવે તેમાં સમારેલ ડુંગળી નાખી એકાદ મિનીટ સાંતળી સમારેલ બટાકા ઉમેરવા, મીઠું અને હળદર નાખી 1/4 કપ પાણી ઉમેરી હલાવીને ઢાંકણ ઢાંકી ધીમા તાપે બટાકા પકાવવા, [ કાચા બટાકાના બદલે બાફેલ બટાકા પણ લઇ શકાય તો તેમાં પાણી નાખવાની જરૂર નથી, ડાયરેક્ટ વઘારવા ] બટાકા પાકી જાય પછી ધોયેલ પૌઆ અને આદુ, મરચાની પેસ્ટ, જરૂર પડે તો મીઠું, લીંબુનો રસ અને ખાંડ નાખવા, બધું સારી રીતે મિક્સ કરવું, હવે દૂધ ઉમેરવું, અને એકાદ મિનીટ ધીમા તાપે પકાવી, સમારેલ કોથમીર નાખી હલાવીને  ગેસ બંધ કરવો, સમારેલ કોથમીર વડે સજાવવા, સજાવવા લીંબુની ફાડ પણ મૂકી શકાય।

Read More

વેજ કડાઈ - veg kadai

વેજ કડાઈ :-

સામગ્રી :-
ગાજર - 1નંગ , લાંબુ પાતળુ સમારેલ
કેપ્સીકમ - અડધું, લાંબુ પાતળુ સમારેલ
ફણસી - 1/2 કપ, સોફ્ટ થાય તેમ ઉકાળેલ
ટમેટા - 4 થી 5 નંગ, ઝીણા સમારેલ
ડુંગળી - 2 ચમચા જેટલી ઝીણી સમારેલ
કોથમીર - 2 ચમચા, ઝીણી સમારેલ
આખા ધાણા - 2 ચમચા
કાજુ - 5 નંગ
કાશ્મીરી સુકા લાલ મરચા - 5 નંગ
કસૂરી મેથી - 1/2 ચમચી
ગરમ મસાલો - 1, 1/2 ચમચી
મીઠું - સ્વાદાનુસાર
કાશ્મીરી લાલ મરચા પાઉડર - 2 ચમચી
લસણ - 8 કળી, ઝીણા સમારેલ
પનીર - 3 ચમચા, છીણી લેવું
તેલ - 3 ચમચા + 1 ચમચી
ઘી - 3 ચમચા

રીત :-
         સૌ પ્રથમ વેજ કડાઈ બનાવવા માટે પહેલા કડાઈ મસાલો બનાવવો, આ માટે એક વાસણમાં એક ચમચી તેલ ગરમ કરવું, તેમાં આખા ધાણા, આખા કાશ્મીરી સુકા લાલ મરચા અને આખા કાજુ નાખી તેને સારી સુગંધ આવે ત્યાં સુધી શેકવા, ગેસ બંધ કરી બધું  ઠંડુ થવા દેવું, હવે તેને મિક્સરમાં અધકચરું ક્રસ કરી લેવું, ત્યારબાદ એક વાસણમાં બે ચમચા તેલ અને બે ચમચા ઘી ગરમ કરવું, તેમાં સમારેલ લસણ સાંતળી ત્રણ ચમચા તૈયાર કરેલ મસાલો ઉમેરવો, તેને હલાવી તેમાં સમારેલ ટમેટા ઉમેરવા, તેમાં મીઠું, ગરમ મસાલો, લાલ મરચા પાઉડર અને કસૂરી મેથી નાખવી, હવે ટમેટા એકદમ સોફ્ટ થાય ત્યાં સુધી ગ્રેવી હલાવવી, ગેસ બંધ કરવો, હવે બીજા વાસણમાં એક ચમચો તેલ અને એક ચમચો ઘી ગરમ કરવું, તેમાં સમારેલ ડુંગળી સાંતળી , કેપ્સીકમ, ગાજર અને ફણસી નાખવા તેમાં થોડું મીઠું અને કડાઈ મસાલો નાખી થોડી વાર પકાવવું, હવે તેમાં છીણેલ પનીર, તૈયાર કરેલ ગ્રેવી અને બે ચમચા પાણી નાખી બધું થોડીવાર હલાવી સમારેલ કોથમીર નાખી ગેસ બંધ કરવો, તો તૈયાર છે વેજ કડાઈ, તેને પરોઠા કે નાન સાથે પીરસવી।

Read More

ચણાના લોટના પુડલા - Chana na lot na pudla

ચણાના લોટના પુડલા :-

સામગ્રી :-
ચણાનો લોટ - 1 કપ
મેથીની ભાજીના પાંદડા - 2 ચમચા જેટલા
આદુ, મરચા,લસણની પેસ્ટ - 1,1/2 ચમચી
મીઠું - સ્વાદાનુસાર
અજમો - 1/4 ચમચી
હળદર - 1/4 ચમચી
તેલ - થોડું
પાણી - જરૂર પ્રમાણે

રીત :-
          સૌ પ્રથમ ચણાના લોટમાં મીઠું, અજમો અને હળદર નાખવા, હવે તેમાં થોડું થોડું પાણી નાખતા જઈ અને લોટના ગઠ્ઠા ના રહે તેમ હલાવતા જઈને બહુ ઘટ્ટ પણ નહી અને બહુ પાતળું પણ નહી એવું ખીરું તૈયાર કરવું, હવે આ ખીરામાં મેથીની ભાજીના પાંદડા ઝીણા સમારીને નાખવા, આદુ,મરચા અને લસણની પેસ્ટ ઉમેરી ખીરું હલાવી લેવું, હવે એક નોનસ્ટીક તવો ધીમા તાપે ગરમ કરવો, તવો થોડો ગરમ થાય એટલે તેમાં ગોળ ચમચા વડે ખીરું રેડીને ઢોસાની જેમ પુડલો પાથરવો, ફરતે થોડું તેલ નાખી પુડલાની એક બાજુ ગોલ્ડન બ્રાઉન કલરની થાય એટલે બીજી બાજુ શેકી લેવી, તો તૈયાર છે ટેસ્ટી અને હેલ્ધી પૂડલા।

Read More

મેથીના ભજીયા [ ગોટા ] - METHI PAKODA

મેથીના ભજીયા [ ગોટા ] :-

સામગ્રી :-
મેથીની ભાજીના પાંદડા - 2 કપ
સમારેલ ડુંગળી - 1/2 કપ જેટલી
મીઠું - સ્વાદાનુસાર
હળદર - 1/2 ચમચી
લાલ મરચા પાઉડર -1/2 ચમચી
ધાણા પાઉડર -1/2 ચમચી
અજમો - 1/4 ચમચી
ચણાનો લોટ - 1/2 કપ
ખાવાનો સોડા - 1/4 ચમચી
તેલ - તળવા માટે
પાણી - જરૂર પડે તો

રીત :-
        સૌ પ્રથમ મેથીની ભાજીના પાંદડાને સમારી લેવા, તેમાં સમારેલ ડુંગળી, ભાજીમાં ખારાશ હોવાથી થોડું મીઠું, હળદર, લાલ મરચા પાઉડર, ધાણા પાઉડર, ચણાનો લોટ, અજમો અને ખાવાનો સોડા નાખી આ બધું મિક્સ કરવું, ભાજીમાં પાણી હોવાથી પાણીની જરૂર રહેતી નથી પણ છતાં સોફ્ટ લોટ કરવા એક થી બે ચમચી પાણી નાખી શકાય, હવે એક વાસણમાં મધ્યમ તાપે તેલ ગરમ કરવું, તેલ ગરમ થાય એટલે સહેજ હાથ પાણીમાં ભીનો કરી તૈયાર કરેલ સોફ્ટ લોટમાંથી ગોળા તૈયાર કરતા જવું અને તેલમાં નાખતા જવું, હવે તેને ધીમા તાપે જ અધકચરા તળી લેવા, થોડા ઠંડા થવા દઈ ફરી તેલ ધીમા તાપે ગરમ કરી, તેમાં ભજીયા બ્રાઉન કલરના થાય ત્યાં સુધી તળવા જેથી તે ક્રિસ્પી થાય, આ મેથીના ભાજીયાને ગરમા ગરમ ચટણી સાથે નાસ્તામાં કે જમવામાં પણ લઇ શકાય, મેથીમાં લોહ તત્વ સારા હોવાથી જો તેના  ભજીયા બનાવીએ તો ટેસ્ટની સાથે તેના સારા ગુણ પણ મળે છે.

 

Read More

દુધીના મુઠીયા - DUDHI NA MUTHIYA

દુધીના મુઠીયા :-

સામગ્રી :-
છીણેલ દુધી - 250 ગ્રામ
ઘઉંનો લોટ - 1,3/4 કપ [ પોણા બે કપ ]
ચણાનો લોટ - 1/2 કપ
આદુ લસણની પેસ્ટ - 1 ચમચી
તેલ - 1 ચમચો + 2 ચમચા વઘાર માટે ચમચી
તલ - 2 ચમચી
રાઈ - 1/2 ચમચી
જીરું - 1/2 ચમચી
હિંગ - 1/4 ચમચી
સમારેલ કોથમીર - 1/2 કપ
મીઠું - સ્વાદાનુસાર
લાલ મરચા પાઉડર - 1/2 કપ
હળદર - 1/4 ચમચી
ધાણા પાઉડર - 1 ચમચી
ખાંડ - 1/2 ચમચી
ખાવાનો સોડા - 1/4 ચમચી

રીત :-
     સૌ પ્રથમ મુઠીયાના સ્ટીમરમાં ધીમા તાપે પાણી ગરમ થવા મૂકી દેવું, હવે એક વાસણમાં છીણેલ દુધી , ઘઉંનો લોટ , ચણાનો લોટ , મીઠું,હળદર , લાલ મરચા પાઉડર, ધાણા પાઉડર , ખાંડ ,1 ચમચો તેલ , ખાવાનો સોડા ,સમારેલ કોથમીર , આદુ લસણની પેસ્ટ આ બધું લઇ તેને હાથ વડે મસળીને ભેગું કરવું, થોડો ઢીલો લોટ રહે તેમ બાંધવું , દુધીમાં પાણી હોવાથી પાણી નાખવાની જરૂર રહેતી નથી છતાં જરૂર પડે તો થોડું પાણી નાખવું, હવે આ લોટમાંથી થોડો ભાગ લઇ મુઠ્ઠી વચ્ચે દબાવતા જઈ તેમાંથી મુઠીયા તૈયાર કરતા જઈ સ્ટીમરમાં ગોઠવતા જવું, હવે સ્ટીમર ઢાંકીને 15 થી 20 મિનીટ માટે મુઠીયા બાફવા, ત્યારબાદ મુઠિયા થોડા ઠંડા થાય એટલે કાપી લેવા, હવે વઘાર માટે તેલ ગરમ કરવું, તેમાં રાઈ તતડાવી જીરું અને તલ નાખવા , તલ તતડે એટલે હિંગ નાખી ધીમેથી સમારેલ મુઠીયા નાખવા તેને ફેરવતા જઈ બે થી ત્રણ મિનીટ બાદ ગેસ બંધ કરવો, ટેસ્ટી નાસ્તો દુધીના મુઠીયા તૈયાર।
 

Read More

ભરેલા કરેલા - BHARELA KARELA

ભરેલા કરેલા :-

સામગ્રી :-
કારેલા - 4 નંગ, મધ્યમ કદના
તેલ - 2 ચમચા + તળવા માટે
જીરું - 1 ચમચી
હિંગ - 1/4 ચમચી
ચણાનો લોટ - 2 ચમચા
મીઠું - સ્વાદાનુસાર
હળદર - 1/4 ચમચી
લાલ મરચા પાઉડર - 1/2 ચમચી
આમચૂર પાઉડર - 1, 1/2 ચમચો
ધાણા પાઉડર - 2 ચમચા
વરીયાળી પાઉડર - 1 ચમચો

રીત ;-
         સૌ પ્રથમ કારેલાને ધોઈ અને છોલી નાખવા, વચ્ચે ઉભો કાપો કરી તેમાંથી તેના બી અને ગર્ભ કાઢી લેવા , તેમાંથી કુમળા ભાગ અને સોફ્ટ બી હોય તેને અલગ રાખી મુકવા તેનો ઉપયોગ મસાલો બનાવવામાં કરવો, હવે કારેલા પર અંદર અને બહાર વ્યવસ્થિત રીતે મીઠું લગાવી અડધો કલાક રાખી મુકવા, અડધો કલાક પછી તેને નીચોવીને મીઠાનું છુટ્ટું પડેલ પાણી કાઢી લેવું જેથી કડવાશ  દુર થશે, હવે એક વાસણમાં તેલ ગરમ કરવું, તેમાં કારેલાને ગોલ્ડન બ્રાઉન કલરના થાય તેમ તળી લેવા,હવે મસાલો બનાવવા માટે તેલ ગરમ કરવું, તેલ ગરમ થાય એટલે તેમાં જીરું શેકી, હિંગ, કારેલાના રાખી મુકેલ સોફ્ટ બી અને ચણાનો લોટ નાખી એક થી બે મિનીટ હલાવીને શેકવા, હવે તેમાં મીઠું, હળદર, લાલ મરચા પાઉડર, આમચૂર પાઉડર, વરીયાળી પાઉડર અને ધાણા પાઉડર નાખી હલાવતા જઈ થોડીવારમાં ગેસ બંધ કરવો, હવે આ મસાલાને તળેલ કારેલા વચ્ચે ભરી દેવો, મસાલો નીકળી ના જાય એ માટે કારેલા પર ફરતે દોરો બાંધી શકાય, હવે આ કારેલાને વધેલ મસાલાવાળા વાસણમાં જ ગોઠવી ધીમા ગેસ પર એક થી બે મિનીટ ગરમ કરવા હલાવી ગેસ બંધ કરી દોરો બાંધેલ હોયતો દુર કરી ગરમા ગરમ પીરસવા।

Read More

સુકી ભાજી - SUKI BHAJI

                                                      
સુકી ભાજી :-

સામગ્રી :-
બાફેલ બટાકા - 4નંગ , મધ્યમ કદના
સમારેલ લીલું મરચું - 1નંગ
મીઠા લીમડાના પાન - 7 થી 8 નંગ
કાચા સિંગદાણા - 1/2 કપ
હિંગ - 1 ચપટી
તેલ - 2 ચમચા
રાઈ - 1/2 ચમચી
જીરું - 1/2 ચમચી
મીઠું - સ્વાદાનુસાર
લીંબુનો રસ - 2 ચમચી
હળદર - 1/4 ચમચી
લાલ મરચું - 1/4 ચમચી
ધાણા પાઉડર - 1 ચમચી
સમારેલ કોથમીર - 1/2 ઝુળી

રીત :-
             સૌ પ્રથમ બાફેલ બટાકાને એકસરખા ટુકડા થાય તેમ સમારી લેવા, સિંગદાણાને અધકચરા વાટી લેવા, હવે એક વાસણમાં તેલ ગરમ કરવું, તેમાં રાઈ તતડાવવી, જીરું નાખવું અને હિંગ નાખવી, હવે તેમાં વાટેલ સિંગદાણા નાખી તે સોફ્ટ થાય તેમ બે થી ત્રણ મિનીટ હલાવવા, ત્યારબાદ સમારેલ લીલું મરચું અને મીઠા લીમડાના પાન નાખી હલાવવું, હવે તેમાં બાફેલ બટાકાના ટુકડા અને મીઠું, હળદર, લાલ મરચું, ધાણા પાઉડર અને લીંબુનો રસ નાખવો અને આ બધું ઉછાળતા જઈ [ ટોસ કરી ] મિક્સ કરવું, મસાલો વ્યવસ્થિત મિક્સ થાય એટલે ગેસ બંધ કરવો, સમારેલ કોથમીર વડે ગાર્નીશ કરવું, તો તૈયાર છે ગુજરાતની સ્વાદિષ્ટ સબ્જી સુકીભાજી।

Read More

ગ્રીલ સેન્ડવીચ - grilled sandwitch

ગ્રીલ સેન્ડવીચ :-

સામગ્રી :-
બ્રાઉન બ્રેડ - 8 સ્લાઈસ
ડુંગળી - 1 નંગ
કાકડી - 1 નંગ
ટમેટા - 2 નંગ
કેપ્સીકમ - 1 નંગ
પનીર - 4 પાતળી સ્લાઈસ કરવી [ અંદાજે 100 ગ્રામ લેવું ]
મીઠું - સ્વાદાનુસાર
ચાટ મસાલો - સ્વાદાનુસાર
ચીઝ સ્લાઈસ - 4 નંગ
કોથમીર મરચાની ચટણી - 4ચમચા
ટમેટાનો કેચપ - 3 ચમચા

રીત :-
        સૌ પ્રથમ ડુંગળી, ટમેટા અને કાકડીને ગોળ સ્લાઈસ થાય તેમ કટ કરવા, કેપ્સીકમને પાતળું,લાંબુ કટ
કરવું, હવે ચાર બ્રેડ લેવી, તે દરેક પર પનીરની એક એક સ્લાઈસ ગોઠવવી, તેના પર સરખે ભાગે ડુંગળી, કાકડી અને ટમેટાની સ્લાઈસ ગોઠવવી, સમારેલ કેપ્સીકમ ચારેય ઉપર ગોઠવવું,હવે ઉપર ચાટ મસાલો અને મીઠું છાંટવું, ઉપર ચીઝની એક એક સ્લાઈસ મુકવી, હવે બીજી ચાર બ્રેડ લેવી તેના પર કોથમીરની ચટણી અને ટમેટાનો કેચપ ફેલાવવો, આ બ્રેડને તૈયાર કરેલ બ્રેડ ઉપર રાખી અને થોડો વધુ સમય ગ્રીલ કરવી, ગોલ્ડન બ્રાઉન કલરની થાય એટલે ચટણી સાથે પીરસવી।

Read More

પકોડા - BREAD PAKODA

પકોડા :-

સામગ્રી :-
બ્રેડ - 4 સ્લાઈસ
ચણાનો લોટ - 2 કપ
બાફેલ બટાકા - 4 નંગ, મધ્યમ કદના
સમારેલ કોથમીર - 1/2 કપ
લસણની કળી - 6 નંગ
આદુ - 1 ઈંચનો ટુકડો
લીલા મરચા - 4 નંગ
લીમડાના પાન - 7 નંગ
લાલ મરચા પાઉડર - 1 ચમચી
મીઠું - સ્વાદાનુસાર
હિંગ - 1/2 ચમચી
હળદર - 1/4 ચમચી
તેલ - 1 ચમચો + તળવા માટે
રાઈ - 1 ચમચી
ખાવાનો સોડા - 1/2 ચમચી
પાણી - જરૂર પ્રમાણે

રીત :-
       સૌ પ્રથમ ચણાના લોટમાં હળદર, મીઠું,1/4 ચમચી હિંગ ,લાલ મરચા પાઉડર અનેથોડું થોડું પાણી નાખી તેમાં ગઠ્ઠા ના રહે એ રીતે હલાવી મધ્યમ ઘટ્ટ ખીરું  તૈયાર કરવું , તેને ઢાંકી રાખી દેવું, હવે બાફેલ બટાકાનો માવો કરવો અથવા તેને ખમણી લેવા, ત્યારબાદ કોથમીર , લીલા મરચા , લસણ અને આદુ ને મિક્સર જારમાં લઇ, થોડું પાણી નાખી તેની પેસ્ટ કરી લેવી , હવે એક વાસણમાં એક ચમચો તેલ ગરમ કરવું, તેમાં રાઈ નાખવી તે તતડે એટલે લીમડાના પાન, વધેલ હિંગ, અને તૈયાર કરેલ પેસ્ટમાંથી બે થી અઢી ચમચા વઘારમાં નાખી તેને હલાવીને બે મિનીટ સાંતળવુ, હવે તેમાં બાફેલ બટાકાનો માવો, હળદર, મીઠું નાખી બે મિનીટ હલાવી ગેસ બંધ કરી મસાલો ઠંડો થવા દેવો, મસાલો ઠંડો થાય એટલે તેને બ્રેડ ઉપર ત્રણ ચમચી જેટલો ફેલાવી ઉપર બીજી બ્રેડ ગોઠવી વચ્ચે કાપો પાડવો,આ  બે ત્રિકોણ વચ્ચે કાપા પાડીને એક માંથી ચાર ત્રિકોણ પણ બનાવી શકાય, બધા પકોડા માટેના ત્રિકોણ તૈયાર કરીને તળવા માટે તેલ ગરમ કરવું, હવે ખીરામાં ખાવાનો સોડા નાખી હલાવી તૈયાર કરેલ ત્રિકોણ ને સરખી રીતે તેમાં બોળી તળવા માટે એક પછી એક નાખવા, અને તેની ફેરવી ગોલ્ડન બ્રાઉન કલરના તળી લેવા, ટમેટાની ચટણી સાથે પીરસવા

Read More

કટલેટ્સ - CUTLETS

                                                               

કટલેટ્સ :-

સામગ્રી :-
બાફેલ બટાકા - 2 નંગ, મોટા
બ્રેડ - 4 સ્લાઈસ, મોટી
પૌઆ - 1/4 કપ
મીઠું - સ્વાદાનુસાર
આદુ લસણની પેસ્ટ - 1 ચમચી
લીલા મરચાની પેસ્ટ - 1/2 ચમચી
તલ - 2 ચમચી
સમારેલ કોથમીર - 2 ચમચા
ખાંડ - 1 ચમચી
લીંબુ - 1 નંગ
હળદર - 1/4 ચમચી
ધાણા પાઉડર - 1 ચમચી
ચાટ મસાલો - 1/2 ચમચી
ગરમ મસાલો - 1/4 ચમચી

રીત :-
           સૌ પ્રથમ પૌઆને ખુબજ ઓછા પાણી વડે ભીના કરવા, બટાકાનો માવો કરી લેવો, પણ તેને બહુ મસળવો નહી વધુ મસળવાથી તે ચીકણો થઇ જશે, હવે એક પહોળા વાસણમાં પાણી લેવું, તેમાં વારાફરતી બ્રેડને બોળીને તરત બહાર કાઢી તેને મસળીને બટાકાના માવામાં ઉમેરવી, ભીના પૌઆ ઉમેરવા, હવે આદુ,લસણ અને મરચાની પેસ્ટ તેમાં નાખવી, લીંબુનો રસ, ખાંડ, મીઠું, હળદર, ધાણા પાઉડર, ગરમ મસાલો, ચાટ મસાલો, સમારેલ કોથમીર અને તલ આ બધું તેમાં નાખવું અને બધું હાથ વડે ભેગુ બાંધી લેવું, મસળવું નહી, હવે તેલ વડે હાથ ચીકણા કરી તેમાંથી નાના લુવા લઈને ગોળ અથવા લંબગોળ જે શેપ આપવો હોય તેવી કટલેટ વાળી લેવી, હવે મધ્યમ તાપમાં તેલ ગરમ કરી કટલેટ્સને બ્રાઉન કલરની તળી લેવી, ટામેટાની ચટણી અથવા કોઈપણ ચટણી સાથે ગરમા ગરમ પીરસવી।

Read More

ચુરમા લાડુ - CHURMA LADOO

                                                                

ચુરમા લાડુ :-

સામગ્રી :-
ઘઉંનો જાડો લોટ - 2 કપ
દેશી ઘી - 4 ચમચા + તળવા માટે
ખમણેલ ગોળ - 3/4 કપ
દળેલ ખાંડ - 1/4 કપ
ઈલાયચી પાઉડર - 1 ચમચી
જાયફળ પાઉડર - 1 ચમચી
ખસખસ - જરૂર પ્રમાણે
પાણી - જરૂર પ્રમાણે

રીત :-
            સૌ પ્રથમ એક વાસણમાં ત્રણ ચમચા ઘી ગરમ કરવું, ઘી ઓગળે એટલે ગેસ બંધ કરી તેને ઘઉંના જાડા લોટમાં રેડવું, હવે થોડું હુંફાળું પાણી લઇ તેને થોડું જ લોટમાં નાખી બધું મિક્સ કરવું, આ લોટનો થોડો ભાગ લઇ હાથ વડે દબાવવું જો તેનું કઠણ મુઠીયુ વડે તો પાણી નાખવાનું બંધ કરી આ લોટમાંથી મુઠીયા વાળી લેવા, તેને ઘી ગરમ કરી ધીમા તાપે બ્રાઉન કલરના તળી લેવા, હવે આ તળેલ મુઠીયાને હાથ વડે તોડી બે ત્રણ કટકા કરવા જેથી તે જલ્દી ઠંડા થાય, હવે આ કટકા ઠરી જાય એટલે તેને ખાંડણીમાં ખાંડવા અથવા મિક્સરમાં પીસી લેવા, હવે તૈયાર થયેલ ભૂકાને ચાળણીમાં ચાળી લેવો, વધારાના મોટા દાણાને અલગ કાઢી નાખવા, હવે લાડવાની પાય તૈયાર કરવી આ માટે એક ચમચો ઘી ગરમ કરવું તેમાં ગોળ નાખી હલાવવું, ગોળ ઓગળીને બબલ થાય એટલે ગેસ બંધ કરવો, આ પાયને તૈયાર કરેલ મિશ્રણમાં નાખવી, હવે ચમચા વડે બધું મિક્સ કરવું,દળેલ ખાંડ નાખવી, ઈલાયચી અને જાયફળનો પાઉડર નાખવો આ વખત કટ કરેલ ડ્રાયફ્રુટ પણ નાખી શકાય, બધું સારીરીતે મિક્સ કરી લાડુ વાળી લેવા, તેને ખસખસમાં રગદોળી અથવા ઉપર ખસખસ છાંટવું, તો તૈયાર છે સ્વાદિષ્ટ સ્વીટ ચુરમા લાડુ, તેને ગરમ ઠંડા ગમે ત્યારે ખાઈ શકાય।

Read More

ડુંગળીના ભજીયા - ONION PAKODA

ડુંગળીના ભજીયા :-

સામગ્રી :-
ઝીણી સમારેલ ડુંગળી - 2 નંગ મોટી
સમારેલ લીલા મરચા - 2 નંગ
ચણાનો લોટ - 1, 1/2 કપ
ચોખાનો લોટ - 1/2 કપ [ ભજીયા વધુ ક્રિસ્પી બનાવવા ]
મીઠું - સ્વાદાનુસાર
અજમો - 1/4 ચમચી
લાલ મરચું - 1/2 ચમચી
હળદર - 1/4 ચમચી
ધાણા પાઉડર - 2 ચમચી
તેલ - 1/4 કપ + તળવા માટે
ખાવાનો સોડા - 1 ચપટી

રીત :-
          સૌ પ્રથમ ચણાનો લોટ, ચોખાનો લોટ , મીઠું,અજમો , ખાવાનો સોડા અને 1/4 કપ તેલ મિક્સ કરવું , તેમાં સમારેલ ડુંગળી , સમારેલ મરચા અને બધા મસાલા ઉમેરી ફરી હથેળી વડે મિક્સ કરવું , હવે હાથમાં બે ચમચી જેટલું પાણી લઇ આ મિક્સર ઉપર છાંટવું, અને ફરી હથેળી વડે વજન આપી આ બધું મિક્સ કરવું અને બધું સાથે કઠણ બંધાવા લાગે તેટલું જ પાણી નાખવું , જો મિક્સર ચીકણું લાગે તો ચણાનો લોટ ઉમેરી દેવો , હવે તેલ ગરમ કરવું , તેલ મધ્યમ ગરમ થાય એટલે હાથ અથવા ચમચી વડે મીક્સરના  એક એક નાના લુવા લઇ ધીમેથી તળવા નાખવા , જારા વડે ફેરવતા જવું , તાપમાન ધીમું કરતા જવું, હવે ભજીયા ધીમા તાપે જ બ્રાઉન કલરના થાય ત્યાં સુધી તળી લેવા , ચટણી સાથે ગરમા ગરમ પીરસવા

Read More

સમોસા - SAMOSA

                                                          

સમોસા :-

સામગ્રી :-
મેંદો - 2 કપ [250 ગ્રામ ]
ઘી - 1/4 કપ
મીઠું - સ્વાદાનુસાર
તેલ - 1 ચમચો + તળવા માટે
બાફેલ બટાકા - 250 ગ્રામ
લીલા વટાણા - 1/2 કપ
આદુની પેસ્ટ - 1 ચમચી
સમારેલ લીલા મરચા - 2 નંગ
જીરું - 1/2 ચમચી
હિંગ - 1 ચપટી
ધાણા પાઉડર - 1 ચમચી
ગરમ મસાલો - 1/4 ચમચી
લાલ મરચા પાઉડર - 1/2 ચમચી
આમચૂર પાઉડર - 1/2 ચમચી
લય - જરૂર મુજબ [ લય બનાવવા 4 ચમચી મેંદામાં 4 ચમચી જેટલું પાણી નાખી હલાવી લેવું, જેથી આ ઘટ્ટ પ્રવાહી વડે સમોસાની બાજુ ચોંટાડી શકાય ]
રીત :-
    સૌ પ્રથમ સમોસા બનાવવા માટે લોટ બાંધવો, આ માટે એક વાસણમાં મેંદો, મીઠું અને ઘી મિક્સ કરવું તેને થોડું થોડું પાણી નાખતા જઈ કઠણ લોટ બાંધવો, તેને પાંચેક મિનીટ મસળી અને ઢાંકીને રાખવો, હવે સમોસાનો મસાલો તૈયાર કરવા માટે બટાકાની છાલ ઉતારી મસળીને તેનો માવો તૈયાર કરવો, સહેજ બટાકાના ટુકડા રહે એવો માવો કરવો, હવે એક વાસણમાં 1 ચમચો તેલ ગરમ કરવું, તેમાં જીરું શેકવું, ત્યારબાદ હિંગ નાખી આદુની પેસ્ટ અને સમારેલ મરચા નાખવા તેને હલાવીને લીલા વટાણા ઉમેરવા તેને ઢાંકીને બે મિનીટ પકાવવા, ત્યારબાદ બટાકાનો માવો અને બધા મસાલા નાખી હલાવીને ગેસ બંધ કરવો અને મસાલો ઠંડો થવા દેવો, હવે લોટ મસળી તેમાંથી મોટી પૂરી વણાય તે માપના એકસરખા લુવા તૈયાર કરવા, તેમાંથી પૂરી વણવી, પુરીની વચ્ચે એક ઉભો કાપો પાડી તેના બે ભાગ કરવા, તેમાં એક ભાગ લઇ તેની ફરતે લય લગાવી સમોસાનો કોન વાળવો, વચ્ચે બે - ત્રણ ચમચી જેટલો મસાલો ભરી સમોસું બંધ કરવું, આ રીતે બધા સમોસા ભરી લેવા, તેને હવામાં થોડા સુકાવા દેવા જેથી તે ક્રિસ્પી થાય, હવે તેને મધ્યમ તાપમાં ગોલ્ડન બ્રાઉન કલરના તળી લેવા, ચટણી સાથે ગરમા ગરમ પીરસવા।

Read More

કાજૂ પિસ્તા રોલ - KAJU PISTA ROLL

                                                                  

કાજૂ પિસ્તા રોલ :-

સામગ્રી :-
કાજૂ - 1, 1/4 કપ
પિસ્તા - 1 કપ
ખાંડનો પાઉડર -1 કપ
ઈલાયચી પાઉડર - 2 ચપટી
પાણી - જરૂર મુજબ

રીત :-
      સૌ પ્રથમ કાજૂ અને પિસ્તામાંથી પાઉડર તૈયાર કરવો, આ માટે તેને અલગ જ થોડા થોડા શેકી લેવા, ત્યારબાદ મીક્સરના પલ્સ બટન વડે બન્નેનો અલગ પાઉડર તૈયાર કરવો, હવે એક વાસણમાં ખાંડનો પાઉડર લઇ તેને હલાવતા જઈ થોડો ગરમ કરવો, ગેસ બંધ કરવો, હવે કાજૂના પાઉડરમાં અડધો કપ આ ખાંડનો પાઉડર મિક્સ કરવો, તેમાં 1 ચપટી ઈલાયચી પાઉડર નાખી અને એક ચમચા જેટલું પાણી નાખી તેનો કઠણ લોટ બાંધવો, જરૂર પડે તો બે ચમચી જેટલું પાણી નાખી તેને મસળવો, હવે હાથમાં એક ચમચી ઘી લઇ આ લોટ માંથી ગોળો તૈયાર કરવો, ત્યારબાદ એક પ્લાસ્ટિક પાથરી તેની પર આ ગોળામાંથી પાતળો રોટલો વણી લેવો, વચ્ચે ચપ્પુ વડે એક કાપો પાડવો, હવે પિસ્તાના પાઉડરમાં પણ બાકીની ખાંડ અને ઈલાયચી પાઉડર ઉમેરી થોડું પાણી લઇ લોટ બાંધવો, હાથમાં ઘી લગાવી આ લોટમાંથી બે લુવા કરીને હાથ વડે જ પાતળા  લાંબા બે રોલ તૈયાર કરવા, તેને કાજૂના રોટલાની બન્ને બાજુ એક એક મૂકી ધીમા હાથે રોલ તૈયાર કરી એકસરખા કાપા પાડી લેવા, તો તૈયાર છે દિવાળી પર બનતી એકદમ ઇઝી છતાં ટેસ્ટી સ્વીટ કાજૂ પિસ્તા રોલ.
     

Read More

મન્ચુરીઅન - MANCHURIAN

                                                                       

મન્ચુરીઅન :-

સામગ્રી :-
ખમણેલ ફ્લાવર - 1 કપ
ખમણેલ ગાજર - 1 કપ
ખમણેલ કોબીજ - 1 કપ
સમારેલ લીલી ડુંગળી - 1/2 કપ
સમારેલ ફણસી - 1/2 કપ
લીલી ડુંગળીનો સફેદ ભાગ - 4 નંગ, લાંબી સમારવી
સોયા સોસ - 1, 1/2 ચમચો
લસણની પેસ્ટ - 1 ચમચી
આદુની પેસ્ટ - 1 ચમચી
લાલ મરચાની પેસ્ટ - 1/2 ચમચી
મેંદો - 3 ચમચા
કોર્નફલોર - 1 ચમચો + 1 ચમચી પેસ્ટ માટે
મરી પાઉડર - 1/2 ચમચી
વેજીટેબલ સ્ટોક - 1/2 કપ [ રેસિપી  મુકેલ છે ]
સમારેલ લીલા મરચા - 3 નંગ
એમ, એસ, જી [ આજીનો મોટો ] - 2 ચપટી
મીઠું - સ્વાદાનુસાર
વિનેગર - 1 ચમચી
તેલ - 1 ચમચો + તળવા માટે

રીત :-
         સૌ પ્રથમ એક વાસણમાં ખમણેલ ફ્લાવર, ગાજર, કોબીજ, સમારેલ લીલી ડુંગળી, ફણસી, આદુ અને લસણની પેસ્ટમાંથી 1/2 ચમચી, મીઠું,મરી પાઉડર, એમ એસ જી 1 ચપટી લેવા, હવે તેમાં મેંદો અને કોર્નફલોર નાખી તેને મિક્સ કરતા જઈ દબાવીને  કઠણ લોટ બાંધવો, જરૂર પડે તો મેંદો થોડો ઉમેરવો, હવે આ લોટ માંથી નાના લુવા લઇ તેને દબાવતા જઈ મન્ચુરીઅનના ગોળા તૈયાર કરવા, તેલ ગરમ કરી તેને અધકચરા તળી લેવા, થોડીવાર ઠંડા કરી તેને ફરી તળવા, બ્રાઉન કલરના થાય ત્યાં સુધી તળવા, હવે બીજા વાસણમાં એક ચમચો તેલ ગરમ કરવું, તેમાં આદુ, લસણની પેસ્ટ 1/2 ચમચી, સમારેલ મરચા, લાંબી સમારેલ ડુંગળી સાંતળવી, તેમાં સોયાસોસ, વિનેગર, લાલ મરચાની પેસ્ટ, મીઠું અને એમ એસ જી નાખી વેજીટેબલ સ્ટોક ઉમેરવો તે ઉકળે એટલે તેમાં તળેલ મન્ચુરીઅન નાખવા, હવે એક ચમચી કોર્ન્ફ્લોરમાં થોડું પાણી નાખી તેને ઉપર રેડી થોડું હલાવી ગેસ બંધ કરવો, સમારેલ લીલી ડુંગળી વડે ગાર્નીશ  કરવા






 

Read More

રવાનો શીરો [ સૂજીનો શીરો ] - Ravano shiro

                                                              

રવાનો શીરો [ સૂજીનો શીરો ] :-

સામગ્રી :-
રવો [ સૂજી ] - 1/2 કપ
દેશી ઘી - 1/4 કપ
ખાંડ - 1/2 કપ
પાણી - 1, 1/4 કપ
ઈલાયચી પાઉડર - 1 ચપટી
બદામ - 10 થી 12 નંગ
[ ગાર્નીશ કરવા માટે અન્ય ડ્રાયફ્રુટ પણ લઇ શકાય ]

રીત :-
         સૌ પ્રથમ એક વાસણમાં રવો શેકવા માટે ઘી ગરમ કરવું, આ ધીમાં રવો નાખી તેને મધ્યમ તાપમાં ચમચા વડે હલાવતા જવું, રવો તળિયામાં ચોંટે નહી તેનું ધ્યાન રાખવું, બીજા ગેસ પર ખાંડમાં પાણી ઊમેરી તે ઓગળી જાય એટલે ગેસ બંધ કરવો, હવે રવો જયારે શેકાઈને ગોલ્ડન બ્રાઉન કલરનો થાય એટલે તેમાં ખાંડ વાળું પાણી ધીમેથી નાખવું અને હલાવવું, જયારે રવામાં આ પાણી શોષાઈ જાય એટલે ગેસ બંધ કરવો અને ઈલાયચી પાઉડર મિક્સ કરવો, આ શીરાને બદામ કટ કરી તેની વડે ગાર્નીશ કરવો।

Read More

પુરણ પુરી - PURAN POLI

                                                        

પુરણ પુરી :-

સામગ્રી :-

તુવેરદાળ - 1 કપ
ઘઉંનો લોટ - 2 કપ
તેલ - 2 ચમચા
ગોળ [ સમારીને ]  - 1 કપ
ઈલાયચી પાઉડર - 1 ચપટી
ઘી - ઈચ્છા મુજબ
પાણી - જરૂર પ્રમાણે

રીત ;-
            સૌ પ્રથમ તુવેરદાળને ધોઈને તેને કુકરમાં લઇ તેમાં બે કપ પાણી નાખી તેને ચાર સીટી કરી બાફી લેવી, હવે એક વાસણમાં ઘઉંનો લોટ અને તેલ લઇ પાણી વડે રોટલીનો લોટ બાંધી લેવો, ત્યારબાદ કુકર ખોલી બાફેલ દાળમાં ગોળ ઉમેરી તેને ચમચા વડે હલાવતા જઈ ગરમ કરવું, ગોળ દાળ સાથે એકદમ ઓગળી જાય અને વધારાનું પાણી બળી જાય એટલું ગરમ કરી ગેસ બંધ કરવો, આ મિશ્રણમાં ઈલાયચી પાઉડર ઉમેરવો, મિશ્રણ થોડું ઠંડુ થાય એટલે રોટલીના લોટમાંથી નાના લુવા તૈયાર કરી તેને થોડું વણી તેમાં તૈયાર કરેલ પુરણ બે ચમચી જેટલું ભરી વણેલ પૂરીને  ચારે બાજુથી બંધ કરી સહેજ દબાવી ફરી નાની રોટલી હળવા હાથે વણી લેવી, હવે તવો ગરમ કરી આ રોટલીને થોડા ઘી વડે શેકી લેવી, આ રીતે બધી પુરણ પુરી તૈયાર કરી લેવી, તે ખુબ સ્વાદિષ્ટ ગરમા ગરમ ખવાતું વ્યંજન છે.

Read More

નાન [ તવા પર ] - Naan on tawa

                                                                
નાન [ તવા પર ] :-

સામગ્રી :-
મેંદો - 1, 1/2 કપ
તેલ - 1 ચમચો
મીઠું - સ્વાદાનુસાર
ખાંડ - 1/2 ચમચી
બેકિંગ સોડા - 1/4 ચમચી
દહીં - 1/4 કપ
ઘી - જરૂર મુજબ [ નાન પર લગાવવા ]

રીત :-
       સૌ પ્રથમ એક વાસણમાં મેંદો, મીઠું, તેલ, ખાંડ, બેકિંગ સોડા અને દહીં લેવું, ત્યારબાદ લોટ બાંધવા જેટલું પાણી થોડું ગરમ કરવું, મેંદા વાળા મિશ્રણમાં આ પાણી થોડું થોડું  નાખતા જઈ એકદમ સોફ્ટ લોટ બાંધવો, લોટ થોડો હાથમાં ચોંટે એવો સોફ્ટ બાંધવો, ત્યારબાદ હાથમાં થોડું તેલ લગાવી આ લોટને પાંચેક મિનીટ મસળવો, હવે આ લોટ પર થોડું તેલ લગાવી તેને બે કલાક માટે ગરમ જગ્યા પર ઢાંકીને રાખી દેવો, જેથી તે ફૂલીને ડબલ થઇ જશે, ત્યારબાદ હાથમાં મેંદો લગાવી આ લોટમાંથી એકસરખા 5 લુવા તૈયાર કરવા, તેને મેંદામાં રગદોળી લેવા, હવે તવો ગરમ કરવા મુકવો, લુવાને પાટલા પર લઇ વેલણ વડે વણતા જવું, તેને લંબગોળ અથવા ગોળ આકાર આપવો અને રોટલી કરતા થોડો જાડો રાખવો , નાન વણાઈ જાય એટલે ચમચી વડે તેની પર સહેજ પાણી લગાવવું, ત્યારબાદ ગરમ તવા પર નાનનો પાણી લગાવેલ ભાગ નીચે રહે તે રીતે શેકવા મુકવી, નાન પર ફરતે મોટા બબલ દેખાય એટલે તવાને હેન્ડલ વડે પકડી તેને ઉંધો કરી ડાયરેક્ટ ફ્લેમ પર નાનનો બીજો ભાગ શેકવો, નાન પર પાણી લગાડેલ હોવાથી તે પળી જશે નહી, હવે આ ભાગ ફરતે બ્રાઉન બબલ થઇ જાય એટલે તવો સીધો કરી તવેથા વડે નાન કાઢી, ડીશમાં લઇ તેની પર ઘી લગાવવું, આ રીતે બધી નાન તૈયાર કરવી, આ પંજાબી નાનને ગ્રેવી વાળી કોઈ પણ શબ્જી કે છોલે મસાલા સાથે ખાવાની બહુ મજા આવે છે.

Read More

મૂંગ દાલ હલવા - MUNG DAAL HALWA

                                                            

મૂંગ દાલ હલવા :-

સામગ્રી :-
મગની દાળ - 1/2 કપ
દેશી ઘી - 1/2 કપ
ખાંડ - 1 કપ
પાણી - 1, 1/4 કપ
ઈલાયચી પાઉડર - 1/4ચમચી
બદામ - 8 થી 10 નંગ

રીત :-
            સૌ પ્રથમ મગની દાળને ધોઈને 4 થી 5 કલાક પાણીમાં પલાળવી, ત્યારબાદ તેનું પાણી દુર કરી મિક્સરમાં સ્મૂથ પેસ્ટ તૈયાર કરવી, હવે એક વાસણમાં ઘી ગરમ કરવું,  તેમાં મગદાળની પેસ્ટ ઉમેરી તેને હલાવતા જઈ શેકવી, આ પેસ્ટ તળિયામાં ચોંટે નહી તેનું ધ્યાન રાખી હલાવતા જવું, ગઠ્ઠા ના રહે તેનું પણ ધ્યાન રાખવું, બીજા ગેસ પર પાણીમાં ખાંડ ઉમેરી તેને ગરમ કરવું, ખાંડ ઓગળી ગયા બાદ બે ત્રણ મીનીટમાં એ ગેસ બંધ કરવો, પેસ્ટ બ્રાઉન કલરની થાય ત્યાં સુધી ધીમા ગેસ પર શેકવી, હવે આ પેસ્ટમાં ગરમ કરેલ ખાંડનું પાણી ધીમે ધીમે રેડતા જવું અને હલાવતા જવું, હલવો પાણી શોષે ત્યાં સુધી હલાવવો, ત્યારબાદ ગેસ બંધ કરી ઈલાયચી પાઉડર મિક્સ કરી, બદામને કટ કરી તેના વડે હલવો સજાવવો, તો તૈયાર છે, ગરમા ગરમ ખવાતો  સ્વીટ અને ટેસ્ટી મૂંગ દાળ હલવો।

Read More

કલાકંદ - KALAKAND [ SWEET]

                                                                     

કલાકંદ :-

સામગ્રી :-
ફુલ ક્રીમ મિલ્ક - 2 લીટર [ 1 લીટર પનીર બનાવવા + 1 લીટર ઉકાળવા ]
ખાંડ - 100 ગ્રામ
લીંબુનો રસ - 2 ચમચા જેટલો [ પનીર બનાવવા માટે ]
બદામ - 7થી 8 નંગ
પિસ્તા - 8 થી 10 નંગ
ઈલાયચી - 5 દાણા ફોલીને પાઉડર કરવો 

રીત :-
         સૌ પ્રથમ એક લીટર દૂધમાંથી પનીર તૈયાર કરીશું, આ માટે દૂધ ગરમ કરીશું, દુધમાં ઉભરો આવે એટલે ગેસ બંધ કરીશું, દુધમાંથી વરાળ નીકળતી ઓછી થાય કે તરત તેમાં  ધીમે ધીમે લીંબુનો રસ નાખતા જવું અને હલાવતા જવું, દૂધ ફાટી જાય ત્યારે લીંબુનો રસ નાખવાનો બંધ કરીશું, અને તરત સુતરાઉ કપડામાં ગાળી લઈશું, અને આ તૈયાર કરેલ પનીરને પાણી થી ધોઈને કપડામાં જ નીચોવી લઈશું, હવે બીજું એક લીટર દુધને ગેસ પર ગરમ કરવા મુકવું અને હલાવતા જવું, આ દૂધ ત્યાં સુધી હલાવવું કે તે અડધું રહે, દૂધ અડધું રહે એટલું ઘટ્ટ થાય એટલે તેમાં તૈયાર કરેલ પનીરને હાથ વડે મસળી છુટ્ટું કરી ઉમેરવું અને ફરી આ મિશ્રણને હલાવતા જવું જેથી તેનું વધારાનું પાણી બળી જાય, આ રીતે તેનું માવા જેવું મિશ્રણ તૈયાર થશે, હવે તેમાં ખાંડ ઉમેરવી, ફરી તેને હલાવતા જેવું, જયારે ખાંડ એકદમ ઓગળીને જામવા જેવું લાગે એટલે ગેસ બંધ કરી તેમાં ઈલાયચી પાઉડર મિક્સ કરવો, એક ડિશમાં ઘી લગાવી આ મિશ્રણ તેમાં ઠારવું, ઉપર ડ્રાયફ્રુટ
  કટ કરી ભભરાવવા, ઠંડુ પડે એટલે તેના કાપા  પાડી લેવા, કલાકંદ તૈયાર।

Read More

વાટેલી દાળના ખમણ - vateli dalna khaman

                                                       

વાટેલી દાળના ખમણ :-

સામગ્રી :-

ચણાની દાળ - 1 કપ
દહીં - 2 ચમચા
તેલ - 4 ચમચા
આદુ, મરચાની પેસ્ટ - 2 ચમચી
મીઠું - 1/4 ચમચી અથવા તેનાથી પણ ઓછું
હળદર - 1/4 ચમચી
લીંબુનો રસ - 2 ચમચી
ફ્રુટ સોલ્ટ  [ ઈનો ] - 1 ચમચી
રાઈ - 2 ચમચી
હિંગ - 1 ચપટી
સમારેલ કોથમીર - 1/2 ઝૂળી
તળેલ લીલા મરચા - સર્વ કરવા, ઈચ્છા મુજબ

રીત:-
             સૌ પ્રથમ ચણાની દાળને ધોઈને 8 થી 10 કલાક માટે પાણીમાં પલાળવી, ત્યારબાદતેનું પાણી દુર કરી અને થોડું પાણી રહેવા દઈને તેમાં એક ચમચો દહીં અને એક ચમચો તેલ નાખી મિક્સરમાં ખીરું તૈયાર કરી લેવું, આ ખીરાને ગરમ જગ્યા પર ઢાંકીને 6 કલાક અથવા થોડુ ફૂલે [ આથો આવે ] ત્યાં સુધી રાખી મુકવું, હવે આ ખીરામાં ફરી એક ચમચો દહીં, એક ચમચો તેલ ઉમેરવું , સાથે જ આદુ- મરચાની પેસ્ટ, મીઠું, હળદર, લીંબુનો રસ ઉમેરી સારી રીતે ફીણી લેવું, હવે જે વાસણમાં ખમણ બાફ્વાના હોય તેમાં પહેલાથી જ પાણી ગરમ થવા મૂકી રાખવું, અને જે ટ્રેમાં ખમણ બનાવવાના હોય તેમાં તેલ લગાવી દેવું, ત્યાર બાદ ખીરામાં ઈનો નાખી તેને ફીણવું જેવો ઉભરો આવે કે તરત ખીરું ટ્રેમાં રેડીને આ ટ્રેને ગરમ પાણી મુકેલા વાસણમાં રાખી ઢાંકીને 15 મિનીટ માટે ફાસ્ટ ગેસ પર વરાળ વડે  [ સ્ટીમ વડે ] બાફવા, ત્યારબાદ ખમણને ચપ્પુ વડે ચેક કરવા, જો ચપ્પુ કોરું બહાર નીકળે તો ખમણ બફાઈ ગયા હશે, નહિતર ફરી થોડીવાર બાફવા, ત્યારબાદ ખમણ થોડા ઠંડા થાય એટલે તેને ચોરસ કટ કરી લેવા, તેની પર જરા પાણી છાંટવું, હવે તેનો વઘાર તૈયાર કરવા માટે એક વાસણમાં બે ચમચા તેલ ગરમ કરવું, તેમાં રાઈ નાખી તેને તતડવા દેવી,તેમાં હિંગ નાખી ગેસ બંધ કરવો, આ વધાર ખમણ પર ચમચી વડે રેડવો, સમારેલ કોથમીર વડે ગાર્નીશ કરવું, તળેલ મરચા સાથે સર્વ કરવા।

Read More

સેવ ડુંગળીનું શાક - sev dungdinu shak

                                                           

સેવ ડુંગળીનું શાક :-

સામગ્રી :-

લીલી ડુંગળી - 6 નંગ
ઝીણી સેવ - 50 ગ્રામ
તેલ - 1, 1/2 ચમચો
રાઈ - 1/4 ચમચી
જીરું - 1/4 ચમચી
હિંગ - 1 ચપટી
મીઠું - સ્વાદાનુસાર
હળદર - 1/4 ચમચી
લાલમરચા પાઉડર - 1/2 ચમચી
ધાણા પાઉડર - 1/2 ચમચી

રીત :-
             સૌ પ્રથમ લીલી ડુંગળીને ઝીણી સમારી લેવી, હવે એક વાસણમાં તેલ ગરમ કરવું, તેલ ગરમ થાય એટલે તેમાં રાઈ અને જીરું નાખી તતડવા દેવા, તે તતડી ગયા બાદ હિંગ નાખી તરત સમારેલ ડુંગળી નાખવી, હલાવીને સેવમાં મીઠું હોવાથી ડુંગળીના માપનું જ મીઠું ઉમેરવું, બાકીના મસાલા હળદર, ધાણા પાઉડર, લાલ મરચું ઉમેરી ડુંગળી કુક થવા દેવી, લીલી ડુંગળીમાં કુદરતી પાણી હોવાથી તે જલ્દી પાકી જશે, હવે તેમાં જો રસો કરવો હોય તો 1/4 ગ્લાસ જેટલું પાણી ઉમેરવું નહીતર ડાયરેક્ટ ઝીણી સેવ નાખીને શાક હલાવીને ગેસ બંધ કરી દેવો, સેવ ડુંગળીનું શાક જલ્દી તૈયાર થઇ જાય છે અને સ્વાદમાં પણ સ્વાદિષ્ટ બને છે.

Read More

સુરતી લોચો - SURATI LOCHO

                                                              

સુરતી લોચો :-

સામગ્રી ;-
ચણા દાળ - 1, 1/2 કપ
અળદ  દાળ - 1/2 કપ
 પૌઆ - 1/2 કપ
તેલ  - જરૂર પ્રમાણે 
લીલા મરચા - 5 નંગ
આદુંની પેસ્ટ - 1 ચમચી
હિંગ - 1 ચપટી
હળદર - 1/4 ચમચી
મરી પાઉડર - 1/4 ચમચી
લાલ મરચા પાઉડર - 1/2 ચમચી
ઈનો - 1,1/2  ચમચી
મીઠું - સ્વાદાનુસાર
લીંબુ - 2 નંગ
કોથમીર લીલા મરચાની ચટણી - જરૂર પ્રમાણે
સેવ - ગાર્નીશ માટે
કોથમીર - 1/2 ઝૂળી

રીત :-
              સૌ પ્રથમ ચણાની દાળ અને અળદની દાળને  5 કલાક માટે અલગ પલાળવી, પૌઆને પેસ્ટ તૈયાર કરવાની થાય તેની 10 મિનીટ પહેલા પલાળવા, હવે ચણા દાળની કરકરી પેસ્ટ તૈયાર કરવી, અળદની દાળને પણ કરકરી પિસવી, આ દાળની સાથે પૌઆ પણ પીસી લેવા,ત્રણેય પેસ્ટને મિક્સ કરી,  થોડું પાણી ઉમેરી સારી રીતે હલાવવી, ઢોકળાની પેસ્ટ જેવી બને ત્યાં સુધી પાણી ઉમેરવું, હવે આ મિશ્રણમાં આદુની પેસ્ટ, એક મરચું સમારી ઉમેરવું, હળદર, મીઠું, હિંગ આ બધું ઉમેરી હલાવવું, હવે એક ઢોકળા બનાવવાનું વાસણ લઇ, અથવા કોઈ પણ વાસણ કે જેમાં બાફી શકાય, તેમાં 3 થી 4 કપ પાણી નાખી, જેમાં મિશ્રણ ભરવાનું હોય તેમાં તેલ લગાવી લેવું, હવે મિશ્રણમાં 1, 1/2 ચમચી ઈનો [ ફ્રુટ સોલ્ટ ] નાખી ફીણવું, તેમાં સહેજ ઉભરો આવે કે તરત આ મિશ્રણને તેલ લગાડેલ વાસણમાં લઇ તેને સ્ટીમરમાં મૂકી, ઉપર મરી અને મરચા પાઉડર છાંટી, ઢાંકીને 20 મિનીટ  માટે મધ્યમ ગેસ પર બાફવું, ચપ્પુ વડે ચેક કરી ગેસ બંધ કરવો, હવે આ લોચાને ચમચા વડે એક ડીશમાં લઇ, ઉપર તેલ, લીંબુનો રસ, લીલી ચટણી, કોથમીર અને સેવ વડે સજાવી, લીલા મરચા સાથે ગરમા ગરમ સર્વ કરવો,

Read More

સેઝવાન રાઈસ - SHEZWAN RICE

                                                              

                                     
સેઝવાન રાઈસ :-

સામગ્રી :-
બાસમતી ચોખા - 1 કપ
ગાજર - 1 નંગ
કેપ્સીકમ - 1 નંગ
ફણસી - 50 ગ્રામ
લીલી ડુંગળી [ સ્પ્રિંગ ઓનિયન ] - 3 નંગ
લસણ - 10 થી 12 કળી
સેઝવાન સોસ - 3 ચમચી
વિનેગર  - 1/2 ચમચી
ચીલી સોસ - 1/2 ચમચી
તેલ - 2 ચમચા
મીઠું - સ્વાદાનુસાર

રીત :-
               સૌ પ્રથમ ચોખાને અડધો કલાક પાણીમાં પલાળી તેને દરેક દાણો છુટ્ટો રહે તે રીતે બાફી લેવા, ગાજર, કેપ્સીકમ, ફણસી અને લીલી ડુંગળીને એકસરખા માપમાં સમારી લેવા,લસણની કળી ઝીણી સમારી લેવી, હવે એક વાસણમાં તેલ ગરમ કરવું, તેમાં સમારેલ ગાજર, કેપ્સીકમ, ફણસી, લસણ  નાખવા, સમારેલ લીલી ડુંગળીમાંથી થોડી સજાવવા માટે અલગ રાખી બાકીની આમાં ઉમેરી દેવી તેને થોડીવાર સાંતળવા દેવું, આ બધું વધુ પડતું પકાવવું નહી, હવે તેમાં મીઠું ઉમેરવું, સેઝવાન સોસમાં થોડું મીઠું હોવાથી માપનું જ નાખવું, ત્યારબાદ તૈયાર કરેલ ભાત ઉમેરી થોડા ઉછાળીને મિક્સ કરવા, એકાદ મિનીટ ઉછાળ્યા બાદ તેમાં સેઝવાન સોસ, વિનેગર અને ચીલી સોસ ઉમેરી ફરી થોડીવાર ઉછાળીને ગેસ બંધ કરવો, એક ડીશમાં ગરમા ગરમ સેઝવાન રાઈસ લઇ, સમારેલ લીલી ડુંગળી વડે ગાર્નીશ કરી સેઝવાન રાઈસની મજા માણવી।

Read More

કાશ્મીરી પુલાવ - KASHMIRI PULAO

                                                                 

કાશ્મીરી પુલાવ :-

સામગ્રી :-
ચોખા - 1 કપ
ઘી - 3 ચમચા
ડુંગળી - 1 નંગ, લાંબી-પાતળી સમારેલ
મરી - 5 નંગ
તજ - 1 નાનો ટુકડો
લવિંગ - 3 નંગ
ઈલાયચી - 3 નંગ
વરીયાળી - 1 ચમચી
દૂધ - 2 ચમચા
કેસર - 6 થી 7 તાંતણા
મીઠું - સ્વાદાનુસાર
ખાંડ - 1 ચમચી
કાજૂ - 1 ચમચો ફાડા કરવા
દ્રાક્ષ [ લીલી અથવા સૂકી ] - 1 ચમચો
અખરોટ - 2 નંગ, ઝીણી ફોલી લેવી
સફરજન - 1/2" ઇંચના ટુકડા કરવા
દાડમના દાણા - જરૂર પ્રમાણે, સજાવવા

રીત :-
           સૌ પ્રથમ ચોખાને થોડીવાર પાણીમાં પલાળવા, ત્યારબાદ તેનું પાણી દુર કરી તેને બાફી લેવા, ભાત એકદમ છુટ્ટા રહે અને વધુ પડતા બફાઈ ન જાય તેનું ધ્યાન રાખવું, તેને ઠંડા થવા દેવા, ત્યારબાદ એક વાસણમાં 2 ચમચા ઘી ગરમ કરવું, તેમાં મરી, તજ, લવિંગ , ફોલેલ ઈલાયચી અને વરીયાળી નાખી હલાવી અને સમારેલ ડુંગળી ઉમેરવી, તેને બે મિનીટ સાંતળવી, ત્યારબાદ તેમાં તૈયાર કરેલ ભાત ઉમેરવા, હવે થોડું હુંફાળું દૂધ લઇ તેમાં કેસર ઉમેરી આ ભાતમાં નાખી હલાવી લેવા, મીઠું અને ખાંડ ઊમેરી ગેસ બંધ કરવો અથવા આ ભાતને બીજા વાસણમાં કાઢી લેવા, હવે ફરી 1 ચમચો ઘી ગરમ કરવું, તેમાં ડ્રાયફ્રુટ નાખી શેકવા, ત્યારબાદ તેમાં દ્રાક્ષ અને સમારેલ સફરજન નાખી, હલાવી, ગેસ બંધ કરવો તેને તૈયાર કરેલ ભાતમાં ઉમેરવું, છેલ્લે દાડમના દાણા વડે ગાર્નીશ કરવા [ સજાવવા ], કાશ્મીરી પુલાવ તૈયાર, આ પુલાવ ખુબ ટેસ્ટી લાગે છે, દેખાવ પણ સારો લાગવાથી ખાસ દિવસે બનાવી શકાય।

Read More

જીરા રાઈસ - JEERA RICE

જીરા રાઈસ :-

સામગ્રી :-
બાસમતી ચોખા - 1 કપ
ઘી - 1 ચમચી
જીરું - 1 ચમચી
પાણી - 2 કપ
મીઠું - સ્વાદાનુસાર

રીત :-
         સૌ પ્રથમ બાસમતી ચોખાને અડધો કલાક પાણીમાં પલાળવા, ત્યારબાદ જીરા રાઈસ બનાવતી વખતે તેનું પાણી દુર કરવું, હવે જીરા રાઈસ માઇક્રોવેવમાં બનાવવા માટે માઇક્રોવેવ સેફ બાઉલનો ઉપયોગ કરવો, તેમાં એક ચમચી ઘી લઇ તેને માઈક્રો હાઈ પાવર પર 30 સેકન્ડ માટે ઓગળવું, ત્યારબાદ તેમાં એક ચમચી જીરું નાખી તેને માઈક્રો હાઈ પર દોઢ મિનીટ માટે શેકવું, હવે આ બાઉલમાં પાણી, ચોખા અને સ્વાદાનુસાર મીઠું નાખી, માઈક્રો હાઈ પાવર પર 8 મિનીટ માટે પકાવવા, બાઉલ થોડીવાર માઇક્રોવેવ અંદર રહેવા દેવો [ સ્ટેન્ડિંગ ટાઇમ આપવો ] વણાંક વાળા અને સ્વાદિષ્ટ જીરા રાઈસ તૈયાર।
     

Read More

કચોરી ચાટ - Kachori Chaat

                                                       

કચોરી ચાટ :-

સામગ્રી :-
મેંદો - 1 કપ
સુજી - 1/4 કપ
બેકિંગ સોડા - 2 ચપટી
પાણી - જરૂર પ્રમાણે

મસાલો ભરવા માટે-
મગ દાળની પકોડી - 1 વાટકી
બાફેલ બટાકા -1 વાટકી
બાફેલ અંકુરિત મગ - 1 વાટકી
દહીં - 1 વાટકી
કોથમીર મરચાની ચટણી - 1 વાટકી
મીઠી ચટણી - 1 વાટકી
બારીક સેવ - 1 વાટકી
દાડમના દાણા - 1 વાટકી
મીઠું - સ્વાદાનુસાર
જીરું પાઉડર - 4 ચમચી જેટલો
સંચળ - 4 ચમચી જેટલુ
મરચા પાઉડર - 4 ચમચી

રીત :-
              સૌ પ્રથમ એક વાસણમાં મેંદો, સુજી અને બેકિંગ સોડા લઇ તેમાં ધીમે ધીમે પાણી નાખતા જઈ પૂરી જેવો લોટ બાંધવો, તેને મસળીને સોફ્ટ કરવો, હવે તેની પૂરી વણી શકાય તે માપના લુવા તૈયાર કરી લેવા, હવે એક વાસણમાં તેલ ગરમ કરવું, તેલ બરાબર ગરમ થાય ત્યારે લુવો લઇ તેની પાતળી અને ચારે બાજુએથી એકસરખી સપાટી રહે તેવી પૂરી વણવી, તેને ગરમ તેલમાં ધીમેથી નાખી જારા વડે સહેજ દબાણ આપી ફુલાવી તરત સાઈડ બદલાવી ગેસ સહેજ ધીમો કરી જારા વડે પૂરી પર તેલ નાખતા જવું, પૂરી ગોલ્ડન કલરની થાય ત્યાં સુધી તળવી, આ રીતે એક એક પૂરી વણતા જઈ તેને બતાવ્યા મુજબ તળવી, બધી પૂરી તળાઈ જાય એટલે તેને બે થી ત્રણ કલાક ખુલ્લામાં રહેવા દેવી જેથી તે ક્રિસ્પી જ રહેશે,બાફેલ બટાકાને નાના ટુકડા કરી સમારવા, હવે પૂરીમાં  ઉપર થી સહેજ અંગુઠા વડે કાણું પાડી બધી સામગ્રી એકાદ ચમચી જેટલી ભરવી ઉપર દહીં, તીખી અને મીઠી ચટણી રેળી  સંચળ, મીઠું, મરચા પાઉડર, જીરું પાઉડર અને ફરી થોડી સેવ અને દાડમના દાણા નાખી જરૂર મુજબની કચોરી ચાટ તૈયાર કરવી।

Read More

દાળવડા - DALVADA

દાળવડા :-

સામગ્રી :-
ચણાની દાળ - 1 કપ
ડુંગળી - 2 નંગ
લીલા મરચા - 3 થી 4 નંગ
આદુ - નાનો ટુકડો
લીમડાના પાન - 8 થી 10 નંગ
કોથમીર - 1/2 ઝુળી
મીઠું - સ્વાદાનુસાર
તેલ - તળવા માટે

રીત :-
        સૌ પહેલા ચણાની દાળને 2 થી 3 કલાક પાણીમાં પલાળી ત્યારબાદ તેનું પાણી દુર કરવું, લીલા મરચા, અને આદુ મોટા ટુકડામાં કાપવું, , લીમડાના પાન અને કોથમીર સમારી લેવા, ડુંગળીને ઝીણી સમારવી, હવે ડુંગળી સિવાયની બધી વસ્તુને એકસાથે મિક્સરમાં મિક્સ કરી તેની કરકરી પેસ્ટ તૈયાર કરવી, આ પેસ્ટમાં મીઠું અને સમારેલ ડુંગળી ઉમેરી દેવી, હવે તેલ ગરમ કરવું, તેલ ગરમ થાય એટલે તૈયાર કરેલ પેસ્ટમાંથી થોડો લુવો લઇ તેને બન્ને હાથના આંગળા વડે થેપલી બનાવવી અને તળવા માટે ધીમે થી વાસણમાં નાખવી, આ પ્રમાણે બધા વડાને આકાર આપી તૈયાર કરવા અને તે ધીમા તાપે બ્રાઉન રંગના થાય તેમ તળી લેવા, તેને કોકોનટ ચટણી કે સોસ અથવા સાંભાર સાથે પીરસવા।

Read More

મેંદુવડા - Meduvada

મેંદુવડા :-

સામગ્રી :-
લીલા મરચા - 2 થી 3 નંગ
લીમડાના પાન - 8 થી 10
આદુનો ટુકડો - 1 ઇંચ
મીઠું - સ્વાદ પ્રમાણે
અડદની દાળ - 1 કપ
કોથમીર - 1/2 ઝૂળી
પાણી - થોડું
તેલ - તળવા માટે

રીત :-
        સૌ પહેલા અડદની ફોતરા વગરની દાળને ત્રણ થી ચાર કલાક પાણીમાં પલાળી, ત્યારબાદ તેનું પાણી દુર કરી સ્મૂથ પેસ્ટ તૈયાર કરવી, ત્યારબાદ લીલા મરચા, લીમડાના પાન અને કોથમીરને ઝીણા સમારી લેવા, આદુને ખમણી લેવું, હવે અડદની પેસ્ટને 8 થી 10 મિનીટ ફીણવી, જરૂર પડે તો બે થી ત્રણ ચમચી પાણી નાખી ફિણવી, હવે તેમાં મીઠું,સમારેલ મરચા, લીમડાના પાન, કોથમીર અને આદું નાખવું, ફરી બે થી ત્રણ મિનીટ ફીણવું, ત્યારબાદ તેલ ગરમ કરવું, તેલ થોડું ગરમ થાય એટલે બાજુમાં એક પાણી ભરેલ વાટકો રાખવો, આ વાટકાના પાણીમાં હાથ ભીના કરી અડદની પેસ્ટમાંથી એક નાનો લુવો હાથમાં લઇ તેને ઉછાળતા જઈ ગોળો બનાવવો, હવે જે હાથમાં આ ગોળો બનાવ્યો તે હાથના અંગુઠા વડે ગોળામાં વચ્ચે કાણું પાડી ગરમ તેલમાં ધીમેથી વડુ મુકવું, આ રીતે હાથ ભીના કરતા જઈ બધા વડા તૈયાર કરી તેલમાં મધ્યમ તાપમાં ગોલ્ડન બ્રાઉન કલરના તળવા, તો તૈયાર છે મેદુવડા ,તેને નાળિયરની [ ટોપરાની ] ચટણી અથવા કોઈપણ ચટણી કે સોસ સાથે ગરમા ગરમ  ખાવાથી ટેસ્ટી લાગે છે.
 
       

Read More

સક્કરપારા - Sakkarpara

સક્કરપારા :-

સામગ્રી :-
પાણી - 125 મિલી
તેલ - 125 મિલી  + તળવા માટે
મીઠું - સ્વાદાનુસાર
ખાંડ - 1/2 કપ
મેંદો - 300 ગ્રામ
ઘી - 5 થી 6 ચમચી

રીત :-
         સૌ પ્રથમ એક વાસણમાં પાણી, ખાંડ, મીઠું અને તેલ મિક્સ કરી તેને ગેસ ઉપર ગરમ કરવું, મિશ્રણ હલાવવું, ખાંડ પાણીમાં ઓગળી જાય અને પાણીમાં ઉભરો આવવા લાગે ત્યાં સુધી તેને ગરમ કરવું, ગેસ બંધ કરી આ પાણી ઠંડુ થવા દેવું, હવે એક વાસણમાં મેંદો ચાળી લેવો અને  તૈયાર કરેલા પાણીને ધીમે ધીમે તેમાં નાખતા જઈ કઠણ લોટ બાંધી લેવો, આ લોટને 15 મિનીટ ઢાંકી રાખવો, ત્યારબાદ તેમાંથી નાની રોટલી વણી શકાય તેવા એકસરખા માપના લુવા તૈયાર કરી લેવા, તેમાંથી બે નાની રોટલી વણી લેવી, એક રોટલી પાટલા પર ગોઠવી ઉપર એક ચમચી ઘી લગાવી બીજી રોટલી તેની પર રાખી થોડી દબાવી ફરી વણી લેવી, હવે તેને ચપ્પુ અથવા પેસ્ટ્રીકટર વડે સક્કરપારાના આકારમાં [ ડાયમંડ શેપમાં ] કટ કરી લેવી , આ રીતે બધા સક્કરપારા તૈયાર કરવા  , ત્યારબાદ એક વાસણમાં મધ્યમ તાપ પર તેલ ગરમ કરવું, તેલ થોડું ગરમ થાય એટલે સક્કરપારા ગોલ્ડન બ્રાઉન કલરના તળી લેવા।



     

          

Read More

બટાકાવડા - Batakavada

બટાકાવડા :-

સામગ્રી :-
બટાકા - મધ્યમ કદના 6 નંગ
સમારેલ લીલા મરચા - 3 નંગ
લસણની પેસ્ટ - 1,1/2 ચમચી
છીણેલ આદુ - 1"ઇંચનો ટુકડો
લીંબુ - અડધું
ખાંડ - 1 ચમચી
સમારેલ કોથમીર - 1/2 ઝૂળી
મીઠું - સ્વાદાનુસાર
કાશ્મીરી લાલ મરચા પાઉડર- 1/2 ચમચી
હળદર - 1/4 ચમચી
ગરમ મસાલો - 1/4 ચમચી
ચણાનો લોટ - 1,1/2 કપ
ખાવાનો સોડા - 1/4 ચમચી
પાણી - જરૂર પ્રમાણે
તેલ - જરૂર પ્રમાણે

રીત :-
          સૌ પ્રથમ બટાકાને બાફી લેવા, વધુ પડતા બાફવા નહી કારણકે તેનાથી મસાલો ચીકણો થઇ જશે, ત્યારબાદ તેને ફોલીને હાથ વડે મસળી લેવા, વધુ પડતા મસળવા નહિ, હવે એક વાસણમાં ચણાનો લોટ લેવો, તેમાં મીઠું નાખીને થોડું થોડું પાણી નાખતા જઈ અને હલાવતા જઈ ગઠ્ઠા ના રહે એ રીતે એકદમ ઘટ્ટ અથવા પાતળું ના રહે તેવું ખીરું તૈયાર કરવું, ત્યારબાદ તેમાં ખાવાનો સોડા નાખી ફરી ખીરું હલાવી લેવું, તેને ઢાંકી દેવું, હવે બટાકાનો મસાલો વઘારવા માટે એક વાસણમાં બે ચમચી જેટલું તેલ ગરમ કરવું, તેમાં લસણની પેસ્ટ, આદુંની છીણ, સમારેલ લીલા મરચા નાખી એકાદ મિનીટ સાંતળવા, હવે તેમાં મસળેલા બટાકાનો માવો નાખવો, તેમાં હળદર, મીઠું, લાલ મરચા પાઉડર, ગરમ મસાલો, ખાંડ અને અડધું લીંબુનો રસ ઉમેરવો, તેને હલાવી ઉપર કોથમીર ભભરાવી ગેસ બંધ કરવો, મસાલો ઠંડો થાય એટલે તેમાંથી ગોળ વડા વાળી લેવા, હવે એક કડાઈમાં તળવા માટે તેલ ગરમ કરવું, તેલ થોડું ગરમ થાય એટલે તેમથી બે ચમચી તેલ ચણાના લોટના ખીરામાં ઉમેરી ખીરું હલાવી લેવું જેથી વડા કરકરા થશે, હવે તેલ માપનું ગરમ થાય એટલે તૈયાર કરેલ વડાને ખીરામાં હળવા હાથે રગદોળી, હાથ વડે અથવા ચમચી વડે વડા તેલમાં ધીમેથી નાખવા, એક સાથે કડાઈમાં સમાય તેટલા વડા નાખી શકાય, તેને જારા વડે ફેરવતા જઈ ગોલ્ડન કલરના થાય તેમ તળી લેવા, ચટણી અથવા ટોમેટો કેચપ સાથે ગરમા ગરમ પીરસવા।
    

Read More

રવા ઢોસા - RAVA DOSA

                                                       

           
રવા ઢોસા :-

સામગ્રી :-
બારીક રવો - 1/2 કપ
મેંદો - 1/4 કપ
ચોખાનો લોટ - 1/4 કપ
મીઠું - સ્વાદાનુસાર
જીરું - 1/2 ચમચી
હિંગ - 1 ચપટી
સમારેલ કોથમીર - 2 ચમચી
સમારેલ મરચા - 1 ચમચી અથવા સ્વાદાનુસાર
તેલ - 2 ચમચા જેટલું
પાણી - 2 કપ જેટલું

રીત :-
          સૌ પ્રથમ એક વાસણમાં બારીક રવો, મેંદો, ચોખાનો લોટ, મીઠું, જીરું, હિંગ બધું મિક્સ કરવું, હવે તેમાં ધીમે ધીમે પાણી નાખતા જઈ ગઠ્ઠા ના રહે એ રીતે હલાવતા જઈ પાતળું છાસ જેવું ખીરું તૈયાર કરવું, તેને અડધો કલાક ઢાંકીને રાખવું જેથી કરી રવો પાણી શોષી શકે, અડધા કલાક બાદ ખીરામાં સમારેલ મરચા અને કોથમીર ઉમેરવી, હવે ઢોસા તૈયાર કરવા એક ઢોસા બનાવવા માટેનો ફ્લેટ નોનસ્ટીક તવો મધ્યમ તાપમાં ગરમ કરવો, તેમાં થોડું પાણી છાંટી કોટનના કપડા વડે તવો લુછી લેવો ત્યારબાદ તેમાં બે ચમચી જેટલું તેલ ફેલાવવું, હવે ચમચા વડે ખીરાને ચારે તરફ ફેલાય તેમ રેડવું તેવી રીતે જ ઢોસાને ગોળ અથવા ચોરસ આકાર આપવો, ખીરુ ઘટ્ટ ના હોવાથી આ ઢોસાને સહેલાઈથી આકાર આપી શકાય છે, હવે ઢોસાની નીચેની બાજુ બ્રાઉન કલરની થવા લાગે  અને તવીથા વડે સહેલાઇથી ઉખડે એટલે સાઈડ બદલાવવી એક ચમચી તેલ ફેલાવી બીજી બાજુ પણ ઢોસો શેકી લેવો, તેને વાળી પ્લેટમાં લઇ લેવો, આ રીતે બધા ઢોસા બનાવી લેવા, આ ઢોસા ઓછા સમયમાં તૈયાર થઇ જાય છે, તેને નાસ્તામાં પણ લઇ શકાય, અને ડીનરમાં પણ મસાલા ઢોસા બનાવીને લઇ શકાય।

Read More

રસમ - RASAM

રસમ :-

સામગ્રી :-
પાણી - 3 કપ
સમારેલ ટમેટા - 1/2 કપ
સમારેલ લીલા મરચા - 1/4 કપ
સમારેલ ડુંગળી - 1/4 કપ 
લીમડાના પાન - 10 થી 12 નંગ
સમારેલ કોથમીર - 1 કપ
આમલીનું પાણી - 1/4 કપ
મીઠું - સ્વાદાનુસાર
ધાણા પાઉડર - 2 ચમચી
જીરા પાઉડર - 1ચમચી
મરી - 1/2 ચમચી
જીરું - 1 ચમચી
લસણ - 6 થી 7 કળી
બાફેલ દાળનું પાણી - 1/2 કપ
રાઈ - 1/2 ચમચી
હળદર - 1/4 ચમચી
હિંગ - 1 ચપટી
ખાંડ - 2 ચમચી
સુકાલાલ મરચા - 2 થી 3 નંગ
તેલ - 2 ચમચા

રીત :-
          સૌ પ્રથમ એક વાસણમાં પાણી, સમારેલ ટમેટા,સમારેલ લીલા મરચા, સમારેલ ડુંગળી, 1/2 કપ કોથમીર, આમલીનું પાણી, મીઠું, મીઠા લીમડાના 6 પાન, ધાણા પાઉડર અને જીરા પાઉડર લઇ તેને ઢાંકણ ઢાકી ગરમ કરવું, પાણી એકદમ ઉકળવા લાગે અને તેમાં નાખેલ સામગ્રી પાકીને સરસ સુગંધ આવે ત્યારબાદ તેમાં દાળનું પાણી ઉમેરવું, મરી, જીરું અને લસણની કળીને એક ખાંડળીમાં ખાંડી મસાલો તૈયાર કરવો, ત્યારબાદ વઘારીયા અથવા બીજા વાસણમાં તેલ ગરમ કરવું, તેમાં રાઈ નાખવી તે તતડે એટલે લાલ મરચાના બે ભાગ કરી ઉમેરવા, હળદર, મીઠા  લીમડાના બાકીના પાન અને હિંગ નાખી હલાવી આ તડકાને રસમમાં ઉમેરવો છેલ્લે ખાંડ અને મરીનો મસાલો ઉમેરી, ઉપર સમારેલ કોથમીર નાખી, ઢાંકણ ઢાકી એકાદ મિનીટ બાદ ગેસ બંધ કરવો, ટેસ્ટી રસમ તૈયાર।

Read More

સ્વીટ કોર્ન સૂપ - SWEET CORN SOUP

સ્વીટ કોર્ન સૂપ : -

સામગ્રી :-
મકાઈ - 2 કપ
પાણી - 2 કપ
માખણ - 2 ચમચા
મેંદો - 3 ચમચા
દૂધ - 2 કપ
ખાંડ - 2 ચમચા
મરીનો ભૂકો - 1/4 ચમચી
ક્રીમ અથવા દુધની મલાઈ - 1/4 કપ
મીઠું - સ્વાદાનુસાર

રીત :-

          સૌ  પ્રથમ મકાઈના દાણામાં બે કપ પાણી નાખી તેને કુકરમાં બાફી લેવા, મકાઈ બફાઈ ગયા બાદ તેમાંથી 1/4 કપ બાફેલ દાણા અલગ કાઢી લેવા અને બાકીના દાણા ઠંડા પડે એટલે તેને મીક્ષરમાં પાણી સાથે જ વાટી લેવા, ત્યારબાદ તેને રસ ગાળવાની ગળણી વડે ગાળી જાડો પલ્પ તૈયાર કરવો, આ પલ્પમાં અલગ કાઢેલ મકાઈના બાફેલ દાણા ઉમેરી દેવા, હવે એક વાસણમાં ધીમાતાપે માખણ ગરમ કરવું, તેમાં મેંદો નાખી તેને બે મિનીટ શેકવો ત્યારબાદ તેમાં ધીમે ધીમે દૂધ નાખતા જવું અને હલાવતા જવું જેથી ગઠ્ઠા ના રહે, આ વ્હાઈટ સોસમાં મકાઈનો પલ્પ ઉમેરવો, હવે તેમાં મીઠું, ખાંડ અને મરીનો ભૂકો નાખવા , તેને બે મિનીટ ઉકાળવો ,ગેસ બંધ કરવો પીરસતી વખતે  ઉપર ક્રીમ નાખવું, સ્વીટ કોર્ન સૂપ તૈયાર।
 

Read More

પનીર ટિક્કા - Paneer Tikka

પનીર ટિક્કા :-

પનીર - 400 ગ્રામ
દહીં - 1 કપ
કોર્નફ્લોર - 1,1/2 ચમચા
આદુ  લસણની પેસ્ટ - 2 ચમચી
હળદર - 1/4 ચમચી
તેલ - 1 ચમચો
ચાટ મસાલો - 1/2 ચમચી અને 1 ચપટી ઉપર છાંટવા
મીઠું - સ્વાદાનુસાર
કસૂરી મેથી - 1 ચમચો
લાલ મરચા પાઉડર - 1/2 ચમચી

રીત :-

           સૌ પ્રથમ પનીરના 1  ઇંચના ચોરસ ટુકડા કરવા, દહીં એકદમ ઘટ્ટ લેવું અથવા તેને મલમલના કપડામાં બાંધી અડધો કલાક લટકાવવું, અને ફેંટી લેવું હવે પનીર છોડીને બાકીની બધી સામગ્રી દહીંમાં ઉમેરવી,  ત્યારબાદ પનીરના ટુકડા તેમાં ઉમેરવા, અડધો કલાક અથવા પીરસવાના સમય સુધી પનીરને દહીંમાં પલાળેલ રાખવું, હવે એક નોનસ્ટીક બેકિંગ ટ્રે લેવી, તેની અંદર ચારેતરફ તેલ લગાડવું [ ગ્રીઝ કરવી ] પનીરના ટુકડા બેકિંગ  ટ્રેમાં ગોઠવી દેવા, હવે ટ્રેને ઓવનમાં  હાઈરેક પર રાખી 5મિનીટ ગ્રીલ કરવી ત્યારબાદ પનીરના ટુકડાને બીજી બાજુ ફેરવી 4 મિનીટ ગ્રીલ કરવા , જો પનીર ગોલ્ડન-બ્રાઉન કલરના થાય નહી તો ફરી બે મિનીટ ગ્રીલ કરવા, છેલ્લે ઉપર ચાટ મસાલો છાંટીને પીરસવા।

         
 

Read More

સાંભાર - SAMBHAR

સાંભાર :-

સામગ્રી :-

તુવેરદાળ - 1/2 કપ
હળદર - 1/4 કપ
મીઠું - સ્વાદાનુસાર
હિંગ - 1 ચપટી
એમ,ટી ,આરનો સાંભાર મસાલો - 1,1/2 ચમચા
રાઈ - 1 ચમચી
મેથી - 1/4 ચમચી
સરગવાની સિંગ - 2 નંગ
આમલીની  પેસ્ટ - 2 ચમચી
સમારેલ કોથમીર - 2 ચમચા
મીઠો લીમડો  - 8 થી 10 પાન
તેલ - 2 ચમચા 
સુકા લાલમરચા - 2 થી 3 નંગ

રીત :-

                 સૌ પ્રથમ તુવેરદાળ ધોઈ અને તેને 30 મિનીટ માટે પલાળવી, ત્યારબાદ તેમાં થોડું મીઠું, હળદર અને 1,1/2 કપ પાણી નાખી બાફી લેવી , કુકરમાં બાફવા ત્રણ સીટી કરવી, હવે એક વાસણમાં આમલીની પેસ્ટ  લઇ તેમાં 2 કપ પાણી, સરગવાની સિંગના બે થી ત્રણ ઇંચના ટુકડા કરી તેમાં ઉમેરવા, ફરી થોડું મીઠું  અને હળદર નાખવી, સાંભાર મસાલો  ઉમેરવો, હવે આ વાસણને ગેસ પર મધ્યમ તાપ પર ગરમ કરવું ,ઢાંકણ ઢાંકી સિંગ બફાઈ જાય ત્યારબાદ તેમાં તુવેરદાળ બ્લેન્ડ કરી ઊમેરવી ફરી ઢાંકણ બંધ કરી ધીમાતાપે પાંચેક  મિનીટ આ બધું પકાવવું, હવે બીજા ગેસ પર એક વઘારિયું અથવા નાના વાસણમાં તેલ ગરમ કરવું તેલ ગરમ થાય એટલે તેમાં રાઈ તતડાવવી તેમાં મેથી, હિંગ,લાલ મરચા, મીઠો લીમડો આ બધું શેકી આ તડકો  તૈયાર કરેલ સાંભાર પર રેડી તરત ઢાંકણ બંધ કરી એક મિનીટ તેમજ ઉકાળવું ત્યારબાદ ઢાંકણ ખોલી તેમાં સમારેલ કોથમીર ઉમેરી, હલાવીને ગેસ બંધ કરવો, મસ્ત સાંભાર તૈયાર।
 

Read More

પનીર મખની - Paneer makhani

                                                                

પનીર મખની :-

સામગ્રી:-
પનીર ક્યુબ - 250 ગ્રામ
માખણ - 2 ચમચા
ડુંગળી - 2 નંગ, તેની પ્યુરી તૈયાર કરવી
ટમેટા - 2 નંગ, તેની પ્યુરી તૈયાર કરવી
આદું લસણની પેસ્ટ - 1 ચમચી
કાજુ - 1 ચમચા કાજુને થોડા દુધમાં 1 કલાક પલાળી પેસ્ટ તૈયાર કરવી
લવિંગ - 2 નંગ
તમાલપત્ર - 1 નંગ
તાજી મલાઈ [ફ્રેશ ક્રીમ ]  - 1/2 કપ
કસુર મેથી - 1 ચમચી
કોથમીર - 1 ચમચો સમારેલ
મીઠું - સ્વાદાનુસાર
હળદર - 1/4 ચમચી
લાલ મરચું - 1 ચમચી
ધાણાજીરું પાઉડર - 2 ચમચી
ગરમ મસાલો - 1/2 ચમચી

રીત :-
         સૌ પહેલા એક વાસણમાં માખણ ગરમ કરવું , ત્યારબાદ તેમાં લવિંગ અને તમાલપત્ર શેકવું, હવે તેમાં ડુંગળીની પ્યુરી અને મીઠું નાખવું તેને હલાવતા જઈ, તેનું પાણી બળે તેમ 5 થી 6 મિનીટ સાંતળવી,હવે તેમાં આદુ લસણની પેસ્ટ ઉમેરવી, ત્યારબાદ તેમાં ટમેટાની પ્યુરી, બાકીના મસાલા અને કસૂરી મેથી નાખવી, હલાવી અને ઢાંકણ બંધ કરી 3 મિનીટ મધ્યમ તાપમાં પકાવવું, હવે ઢાંકણ ખોલી તેમાં થોડું પાણી અને કાજુની પેસ્ટ ઉમેરવી બે થી ત્રણ મિનીટ પકાવવું, ત્યારબાદ તેમાં ફ્રેશ ક્રીમ અને પનીર ક્યુબ [ પનીરના મોટા ચોરસ ટુકડા ] ઉમેરી બે મિનીટ પકાવી ગેસ બંધ કરવો, કોથમીર વડે સજાવવું, પનીર મખની તૈયાર, તેને નાન, રોટલી કે જીરા રાઇસ સાથે ખાઈ શકાય છે.


 

Read More

વેજ હાકા નુડલ્સ - Veg Haka noodles

                                                                

                             
વેજ હાકા નુડલ્સ :-

સામગ્રી :-
કોબીજ - 1 કપ , લાંબી, પાતળી સમારેલ
ગાજર - 1 કપ લાંબુ, પાતળું સમારેલ
કેપ્સીકમ [ સિમલા મરચું ] - 1 નંગ , લાંબુ, પાતળું સમારેલ
ડુંગળી - 1/2 કપ, લાંબી, પાતળી સમારેલ
લીલી ડુંગળી - 1/4 કપ સમારેલ
વેજ હાકા નુડલ્સ - 150 ગ્રામ
તેલ - 3 ચમચા
ટોમેટો કેચપ - જરૂર મુજબ
ચાઉમીન મસાલો - 3 ચમચા જેટલો  [ ચિંગ્સના વેજ હાકા  નુડલ્સના પેકિંગ સાથે જ તેમાં જરૂર મુજબનો આ મસાલો અથવા બે પ્રકારના સોસ આવે છે, જેનો રેસિપીમાં ઉપયોગ કરવો ]
પાણી - જરૂર મુજબ

રીત :-
        સૌ પહેલા હાકા નુડલ્સ અધકચરા બાફ્વાના હોય છે, આ માટે એક મોટા,પહોળા વાસણમાં 10 કપ પાણી ઉકાળવું, પાણી એકદમ ઉકળવા લાગે ત્યારે તેમાં નુડલ્સના હાથેથી બે ભાગ કરી તેમાં ઉમેરવા, ચમચા વડે ધીમેથી હલાવી લેવું, હવે નુડલ્સને ફાસ્ટ ગેસ પર 3 મિનીટ માટે અધકચરા બાફી લેવા, ત્યારબાદ ગેસ બંધ કરી તેને મોટી ચાળણીમાં લઇ પાણી  દુર કરવું, ઉપર થોડું પાણી  રેડવું જેથી તે વધુ પોચા થાય નહી, હવે તરત તેને એક મોટી ડીશમાં લઇ છુટા કરવા અને ફરતે એક ચમચો તેલ રેડવું, જેથી તે ચોંટી જાય નહી, હવે ફરી એક મોટું,પહોળું વાસણ લઇ બાકીનું તેલ ગરમ કરવું, તેમાં સમારેલ કેપ્સીકમ, ડુંગળી, ગાજર, કોબીજ આ બધું નાખવું અને તેને ફાસ્ટ ગેસ પર ઉછાળતા જઈ 3 મિનીટ માટે સાંતળવું, હવે તેમાં નુડલ્સ સાથે આવેલ ચાઉમીન મસાલો ઉમેરવો, હલાવીને તેમાં અધકચરા બાફેલ નુડલ્સ ઉમેરવા, બે ચમચા અથવા સ્વાદાનુસાર  કેચપ ઉમેરવો અને ફરી તેને ઉછાળતા જઈ 3 મિનીટ માટે આ બધું સાંતળવું, હવે સમારેલ લીલી ડુંગળી ઉમેરી ફરી 1 મિનીટ  સાંતળવું, ગેસ બંધ કરવો, રેસ્ટોરન્ટ સ્ટાઈલ ચાઇનીઝ હાકા નુડલ્સ તૈયાર.

Read More

મફિન્સ - Muffins

                                                             

મફિન્સ:-

સામગ્રી :-
મેંદો - 100 ગ્રામ
કોકો પાઉડર - 60 ગ્રામ
બેકિંગ પાઉડર - 1/2 ચમચી
ખાવાનો સોડા - 1/2 ચમચી
કન્ડેન્સ મિલ્ક - 200 ગ્રામ
માખણ - 120 ગ્રામ
માવો - 120 ગ્રામ
દૂધ - 100 મિલી
ચોકલેટ ચિપ્સ - 1/2 કપ

રીત :-
         સૌ પ્રથમ એક વાસણમાં મેંદો, કોકો પાઉડર, બેકિંગ પાઉડર અને ખાવાનો સોડા આ બધું સાથે લઇ ચાળી લેવું, હવે બીજા વાસણમાં માખણ અને ક્ન્ડેન્સ મિલ્કને એકદમ ફીણવું, ત્યારબાદ તેમાં માવો હાથ વડે મસળી છૂટો કરી મિક્સ કરવો અને ફરી ફીણવું, ફીણવાથી તે ક્રીમ જેવું દેખાશે, ત્યારબાદ તેમાં ચાળીને તૈયાર કરેલ લોટનું મિશ્રણ ધીમે નાખતા જવું અને ફીણતા જવું, અડધા ચોકલેટ ચિપ્સ ઉમેરી ફીણવું, હવે તેમાં દૂધ મિક્સ કરી ફરી ફીણવું, મફીન્સનું મિશ્રણ તૈયાર છે, હવે તેને બેક કરવા માટે મફીન્સ કપ વાળી સીલીકોન ટ્રે
લઇ તેના દરેક કપનો પોણો ભાગ આ મિશ્રણથી ભરી ઉપર બાકીના ચોકો ચિપ્સ ભભરાવવા, હવે ઓવનને 180 સેન્ટીગ્રેડ પર પ્રીહીટ કરી મફિન્સને 30 મિનીટ સુધી બેક કરવા, મફીન્સ તૈયાર.

Read More

ગાજરનો હલવો - Gajarno halawo

                                                        

ગાજરનો  હલવો :-

સામગ્રી :-
ગાજર - 500 ગ્રામ છીણી લેવા
માવો - 1/2 કપ
દૂધ - 1/2 કપ
ખાંડ - 1/2 કપ
દેશી ઘી - 2 ચમચા
ઈલાયચી - 2 નંગનો પાઉડર કરવો
કિસમિસ - થોડા દાણા
કાજૂ - 7 નંગ કટ કરવા
બદામ - 7 નંગ કટ કરવી

રીત :-
       સૌ પ્રથમ એક વાસણમાં 1 ચમચો ઘી ગરમ કરવું, હવે તેમાં છીણેલ ગાજર સાંતળવું, થોડીવાર બાદ તેમાં દૂધ અને ખાંડ મિક્સ કરવા, વાસણ ઢાંકી દેવું અને દૂધ ગાજરમાં શોષાઈ જાય ત્યાં સુધી તેને પકાવવું, ત્યારબાદ તેને હલાવી તેમાં બાકીનું ઘી અને માવાને હાથ વડે મસળી તેમાં ઉમેરી દેવો,  હલાવતા જઈ ફરી 7 થી 8 મિનીટ પકાવવું, હવે તેમાં ઈલાયચી પાઉડર, કિસમિસ, કાજુ અને બદામ મિક્સ કરી ગેસ બંધ કરવો, સ્વાદિષ્ટ ગાજરનો  હલવો તૈયાર।

Read More

રવા કેક [ સૂજી કેક ] - sooji cake

                                                       

રવા કેક  [ સૂજી કેક ] :-

સામગ્રી :-
રવો - 1 કપ
ઘઉંનો લોટ - 1/2 કપ
મેંદો - 1/2 કપ
દહીં - 1/2 કપ
ખાવાનો પીળો રંગ - 1 ચપટી
બેકિંગ પાઉડર - 1 ચમચી
ખાવાનો  સોડા - 1/2 ચમચી
દળેલી ખાંડ - 1 કપ
દૂધ - 1/4 કપ
તેલ - 1/2 કપ
ઈલાયચી પાઉડર - 1/4 ચમચી
કાજૂ - 12 થી 15 નંગ કટ કરેલ

રીત :-
    સૌ પહેલા રવો, ઘઉંનો લોટ, મેંદો, બેકિંગ પાઉડર અને ખાવાના સોડાને બે વાર ચાળી લેવા, હવે એક ઊંડા વાસણમાં તેલ, દહીં અને દળેલી ખાંડને લઇ  ખુબ સારી રીતે ફીણવું, આ મિશ્રણ માખણ જેટલું સોફ્ટ થાય ત્યાં સુધી ફીણવું, હવે તેમાં ચાળેલા લોટનું મિશ્રણ ધીમે ધીમે નાખતા જવું અને હલાવતા જવું, ત્યારબાદ તેમાં ખાવાનો પીળો રંગ [ લાડવાનો રંગ ], દૂધ અને ઈલાયચી પાઉડર નાખી બે મિનીટ ફીણવું, ત્યારબાદ એક કેક બેક કરવાની ટ્રે ને ચારે તરફ તેલ લગાવવું [ ગ્રીઝ કરવું ] અને કેકના મિશ્રણને તેમાં ધીમેથી રેડવું ઉપર કટ કરેલ કાજુને પાથરી સહેજ દબાવી દેવા, હવે ઓવનને 200 સેન્ટીગ્રેડ પર પ્રી હિટ કરી 30 મિનીટ માટે કેક બેક કરવી, પછી તેને ચપ્પુ વડે ચેક કરવી, ચપ્પુ કોરું બહાર આવે તો કેક બરાબર બેક થઇ ગણાય, નહીતર 5 થી 7 મિનીટ ફરી બેક કરવી, ઓવનમાંથી કાઢ્યા બાદ ફરતે ચપ્પુ ફેરવી એક ડીશમાં કાઢી લેવી। [ અનમોલ્ડ કરવી ]

Read More

દાલ ફ્રાય - Dal fry

                                                       

દાલ ફ્રાય :-

સામગ્રી :-
ચણાની દાળ - 1/2 કપ
તુવેર દાળ - 1/2 કપ
ટમેટા - 2 નંગ ઝીણા સમારેલ
ડુંગળી - 1 નંગ ઝીણી સમારેલ
દેશી  ઘી - 3 ચમચા
લીલા મરચા - 2 નંગ ઝીણા  સમારેલ 
લસણની પેસ્ટ - 1 ચમચી
સુકું લાલ મરચું - 1 નંગ
કોથમીર - 1/2 ઝુળી ઝીણી સમારવી
તજ - 1 નાનો ટુકડો
લવિંગ - 2 નંગ
હિંગ - 1 ચપટી
જીરું - 1/2 ચમચી
મીઠું - સ્વાદાનુસાર
હળદર - 1/4ચમચી
લાલ મરચું - 1/2 ચમચી

રીત :-
              સૌ પહેલા બન્ને દાળને ધોઈ તે ડુબે એટલા પાણીમાં અડધો કલાક પલાળવી, ત્યારબાદ તેનું પાણી દુર કરી તેને કુકરમાં અઢી કપ પાણી  [ 2, 1/2 કપ ] અને થોડું મીઠું નાખી ચાર સીટી વગાડી બાફવી, હવે એક વાસણમાં 2 ચમચા ઘી ગરમ કરવું, તેમાં જીરું શેકવું, હવે તેમાં તજ, લવિંગ ઉમેરવા, લીલા મરચા નાખવા, ડુંગળી અને  થોડું મીઠું નાખી તેને સાંતળવી, સમારેલ ટમેટા , હળદર અને  લાલમરચું નાખી તેને બે મિનીટ પકાવવા, હવે તેમાં બાફેલ દાળને બ્લેન્ડ કર્યા વગર આખી દાળ ઉમેરવી, તેને ધીમેથી હલાવી પાંચ મિનીટ પકાવવી, હવે કોથમીર નાખી, તેને હલાવી ગેસ બંધ કરવો, હવે એક વઘારીયામાં બાકીનું ઘી ગરમ કરવું તેમાં આખુ સુકું લાલ મરચું, હિંગ અને લસણની પેસ્ટ નાખી ધુમાડો  નીકળે એટલે સહેજ હલાવી આ વઘાર તૈયાર કરેલ દાળમાં રેડવો, તો તૈયાર ટેસ્ટી પંજાબી દાલ ફ્રાય।

Read More

ગુજરાતી દાળ - Gujarati Dal

                                                       

                                                                              
ગુજરાતી દાળ :-

સામગ્રી :-
તુવેર દાળ - 1 કપ
તેલ - 2 ચમચા
રાઈ - 1/2 ચમચી
જીરું - 1/2 ચમચી
હિંગ - 1 ચપટી
મીઠો લીંબડો - 4 થી 5 પાન
તમાલપત્ર - 2 પાન  
લવિંગ - 2 નંગ
તજ - નાનો ટુકડો
આદુ - નાનો ટુકડો છીણી લેવો
લીલા મરચા - 2 નંગ સમારવા
સુકું લાલ મરચું - 1 નંગ
ટમેટા - 2 નંગ સમારવા
કોકમ - 3 નંગ
લીંબુ - જરૂર મુજબ
કાચા સિંગદાણા - 1/4 કપ
કોથમીર - 1/2 ઝુળી સમારવી
મીઠું - સ્વાદાનુસાર
હળદર - 1/4 ચમચી
ધાણા પાઉડર - 1 ચમચી
લાલ મરચું - 1 ચપટી 
ગરમ મસાલો - 1/4 ચમચી
ગોળ - 2 ચમચી

રીત :-
        સૌ પ્રથમ તુવેર દાળને સારી રીતે ધોઈ અડધો કલાક પલાળવી, ત્યારબાદ તેનું પાણી દુર કરી, તેને કુકરમાં લઇ 4 કપ પાણી, કાચા સીંગદાણા અને થોડું મીઠું નાખવું, હવે ચાર સીટી વગાડી દાળ બાફી લેવી, હવે કુકરની વરાળ નીકળવા દેવી, ત્યારબાદ તેને ખોલી દાળમાં થોડું પાણી, માપનું મીઠું અને હળદર નાખી   જેરી લેવી [બ્લેન્ડ કરી લેવી ] હવે દાળનો વઘાર કરવા માટે વઘારીયામાં તેલ ગરમ કરવું, તેલ ગરમ થાય એટલે તેમાં રાઈ અને  જીરું નાખવું, તે તેતડે એટલે તજ, લવિંગ, હિંગ, કોકમ, સુકું લાલ મરચું અને તમાલ પત્ર  નાખવા તેને હલાવી તેમાસમારેલ લીલા મરચા, લીમડાના પાન અને સમારેલ ટમેટા નાખવા, બે મિનીટ પકાવી આ વઘારને દાળમાંનાખવો, હવે દાળમાં ગોળ, ધાણા પાઉડર, લાલમરચું અને ગરમ મસાલો ઉમેરી તેને હલાવવી, પાંચેક મિનીટ દાળને મધ્યમ તાપમાન પર ઉકાળી ગેસ બંધ કરવો,તેમાં સમારેલ કોથમીર નાખવી, અને ઈચ્છા મુજબના લીંબુની ફાડ કરી ભાત, સૂકીભાજી, રોટલી,પાપડ, અથાણું અને છાશ સાથે સર્વ કરવી, તો તૈયાર છે ટેસ્ટી  ગુજરાતી દાળ.

Read More

દાલ મખની - Dal Makhani

                                                               

દાલ  મખની :-

સામગ્રી :-
આખા અડદ - 1/2 કપ
રાજમાં - 2 ચમચા
દેશી  ઘી - 1 ચમચી
માખણ - 2 ચમચી વઘારમાં અને  1 ચમચો ગાર્નીસ કરવા
મલાઈ - 1/2 કપ
ડુંગળી - 2 નંગ ઝીણી સમારેલ
ટમેટા - 2 નંગ પ્યુરી કરવી
મીઠું - સ્વાદાનુસાર
જીરું - 1 ચમચી
ગરમ મસાલો - 1/4  ચમચી
લાલમરચું - 1/2 ચમચી
લસણ - 10 કળી પેસ્ટ કરવી
આદુ - 1 નાનો ટુકડો ઝીણો સમારેલ
કોથમીર - 1 ચમચો ઝીણી સમારેલ

રીત :-
       સૌ પહેલા રાજમાં અને આખા અડદને આખી રાત પાણીમાં પલાળવા, બનાવતી વખતે તેનું પાણી દુર કરી તેને કુકરમાં બે કપ પાણી અને ચપટી સોડા નાખી ત્રણ સીટી કરી બાફી લેવા, હવે આ બાફેલ કઠોળનું પાણી અલગ કરી તેને મૂકી રાખવું, હવે એક વાસણમાં ઘી ગરમ કરવું, તેમાં 2 ચમચી માખણ ઉમેરવું, તેમાં જીરું નાખી શેકવું, ત્યારબાદ તેમાં લસણની પેસ્ટ, સમારેલ આદુ અને સમારેલ ડુંગળી સાંતળવી,મીઠું નાખવું, ડુંગળી ગોલ્ડન બ્રાઉન કલરની થાય ત્યારે તેમાં ટમેટાની પ્યુરી ઉમેરવી, બે મિનીટ પકાવવું, ત્યારબાદ તેમાં
બાફેલ અડદ અને રાજમાં અને તેનું અલગ મુકેલ પાણી માંથી એક કપ પાણી ઉમેરવું, મલાઈ  પણ ઉમેરી દેવી, આ બધું સારી રીતે હલાવી તેમાં લાલમરચું અને ગરમ મસાલો નાખવો, હવે તેનો ઘટ્ટ રસો થાય એટલે ગેસ બંધ કરી, તેને માખણ અને કોથમીરથી ગાર્નીસ કરવું, ટેસ્ટી પંજાબી દાલ મખની તૈયાર।

Read More

કોકોનટ બરફી - Coconut burfi

                                                                   

કોકોનટ બરફી :-

સામગ્રી :-
કોપરાનું છીણ [ સૂકું અથવા તાજુ ] - 1, 1/2 કપ
દૂધ - 1 કપ
ખાંડ - 1/2 કપ
ઈલાયચી પાઉડર - 1 ચપટી
ઘી - 1/2 ચમચી

રીત :-
       સૌ પ્રથમ એક વાસણ ગેસ પર ગરમ કરવું, તેમાં 1/2 ચમચી ઘી નાખવું, કોપરાનું તાજું છીણ નાખી તેને એક મિનીટ સાંતળવુ, હવે તેમાં દૂધ ઉમેરવું અને સતત હલાવતા જઈઘટ્ટ કરવું, હવે દૂધ થોડું ઘટ્ટ થાય કે ગેસ ધીમો કરી હલાવવું, દૂધ એકદમ ઘટ્ટ થઇ જામવા જેવું લાગે એટલે ગેસ બંધ કરવો ઈલાયચી પાઉડર નાખી, તેને ઘી લગાવેલ ડીશમાં પાથરી દેવું, તેના પર કાજૂ અથવા બદામ  લગાવી શકાય, હવે આ બરફીને ફ્રીઝમાં એક કલાક રાખીને ચોરસ આકારમાં કટ કરવી।

Read More